Mwanasiasa wa upinzani kutoka Burundi, Alexis Sinduhije, ambaye ni mkosoaji mkubwa wa chama tawala CNDD-FDD, amesema kuwa njia pekee ya kumaliza matatizo makubwa ya Burundi ni kuondoa kabisa utawala wa sasa, anaodai unaliangamiza taifa.
Sinduhije, kiongozi wa chama cha MSD (Harakati ya Mshikamano na Demokrasia) ambacho hakiruhusiwi tena kufanya kazi Burundi, alizungumza hayo katika mahojiano yaliyotangazwa na Radio Peace FM, redio ya vijana.
Pia alitangaza kuwa anaunga mkono kikamilifu kundi la Red Tabara, kundi la waasi wanaopigana dhidi ya serikali, akiwaita mashujaa wa Burundi wanaolenga kulinusuru taifa.
“Naunga mkono Red Tabara kwa sababu ni mashujaa wa kweli wanaotaka kuiokoa Burundi. Tayari wanapambana na jeshi la Burundi huko DRC na wamefanikiwa kuwafurusha wanajeshi wa FDNB kutoka ngome kadhaa.”
Sinduhije alikataa madai kuwa anashirikiana na serikali ya Gitega, akisema kuwa wafuasi wa MSD zaidi ya 6,000 wako magerezani na 13,000 wameuawa, na baadhi yao hawajulikani walipozikwa.
Aliongeza kuwa asilimia 70 ya wakimbizi wa Burundi ni wafuasi wa MSD, na kwamba hatawahi kushirikiana na utawala wa CNDD-FDD hadi utakapong’olewa madarakani.
Akizungumzia uchaguzi wa wabunge uliopangwa kufanyika tarehe 5 Juni 2025, Sinduhije alisema ni tamthilia tu, akiwataka Warundi wasishiriki uchaguzi na wasiipigie kura CNDD-FDD.
“Uchaguzi huo hauna maana yoyote kwa Warundi.”
Amesema njia pekee ya kuondoa serikali ni kupitia maandamano makubwa, kama yale ya mwaka 2015, au kupambana kwa silaha, ingawa anakiri kuwa njia hiyo inaweza kugharimu maisha ya wengi.
Sinduhije amesisitiza kuwa ataendelea na mapambano ya kuuangusha utawala wa Rais Évariste Ndayishimiye na chama chake cha CNDD-FDD hadi kitakapoondoka.
