Minisiteri y'Ingabo za Repubulika Iharanira Demokarasi ya Congo yahagaritse by’agateganyo impushya zose zo kujya mu mahanga zari zisanzwe zihabwa ba Jenerali n’abandi bofisiye bakuru ba FARDC, mu gihe hari ubwoba bw'uko hari abashobora kwiyunga kuri Joseph Kabila.
Ni icyemezo Minisitiri w'Ingabo za RDC, Guy Kabombo Muadiamvita yamenyesheje Umugaba Mukuru w’Ingabo za FARDC mu ibaruwa yo ku wa 15 Ukwakira, nyuma y’inama y’Inama Nkuru ya Gisirikare n’Umutekano yayobowe na Perezida Félix Tshisekedi ku wa 14 Ukwakira 2026.
Iyo baruwa ivuga ko, hashingiwe ku mabwiriza yatanzwe na Perezida wa RDC akanaba Umugaba w'Ikirenga w'Ingabo, Félix Tshisekedi, ubusabe bwose bw’abajenerali n’abandi ba ofisiye bakuru ba FARDC bwo guhabwa uruhushya rwo kujya hanze y’igihugu buhagaritswe kugeza igihe hazatangirwa andi mabwiriza.
Iyo baruwa iragira iti: "Ubusabe bwose bwo guha ba Jenerali n’abandi bofisiye bakuru uruhushya rwo kujya mu mahanga buhagaritswe kugeza igihe kitazwi."
Iyo baruwa kandi ivuga ko "impushya zari zaratanzwe ariko ntizikoreshwe ziteshejwe agaciro", ibisobanuye ko abari barazihawe ariko bakaba bataragenda batagishobora kuzifashisha, keretse habayeho andi mabwiriza.
Iki cyemezo kije mu gihe RDC ikomeje guhura n’ibibazo by’umutekano, ndetse n’impinduka mu rwego rwa politiki zakurikiye ishingwa ry’umutwe wa Front pour la Refondation de la Nation (FRN) uyobowe n’uwahoze ari Perezida, Joseph Kabila.
Bamwe mu bakurikiranira hafi politiki n’umutekano muri RDC barimo guhuza izi ngamba n’impungenge z’uko FRN ishobora kugira ingaruka ku bumwe bw’inzego z’umutekano, cyane cyane nyuma y’uko Kabila asabye abasirikare ba FARDC kwitandukanya n’ubutegetsi bwa Tshisekedi.