Umwamikazi w’u Bwongereza, Elizabeth II yasabye abaturage kwemera guterwa urukingo rwa Covid-19 ku bwo kwirinda no kurinda n’abandi, cyane ko “rutaryana”.
Nk’uko tubikesha BBC, uyu mwamikazi yabitangarije abakozi mu nzego z’ubuzima bashinzwe kugeza inkingo za Covid-19 mu bice bitandukanye by’igihugu, mu gihe hari inzitizi z’abafite ubwoba bwo kuziterwa.
Elizabeth II avuga ko abantu batakabaye baterwa ubwoba no guterwa izi nkingo, mu gihe bazi ko baba birinda banarinda bagenzi babo kwandura iki cyorezo.
Kuri we, ngo ntibikwiye ko rubatera impungenge kuko na we ufite imyaka 94 y’amavuko yarutewe, ntirwamugiraho ingaruka.
Mu buhamya bwe bw’uko yatewe urukingo rwa Covid-19, yagize ati: “Byarihuse, ntabwo runaryana.”
Umwamikazi Elizabeth II yavuze ko ubwo yari amaze guterwa urukingo rwa Covid-19 muri Mutarama 2021, hari ababonye ko ari ibintu byoroshye bitandukanye n’uko babitekerezaga. Ngo abenshi muri bo bamwandikiye bamubwira ko batunguwe no kubona kuruterwa byoroshye.
Urwego rushinzwe inkingo mu Bwongereza ruvuga ko abantu batewe impungenge no guterwa urukingo rwa Covid-19 bari hagati ya 11 na 15%, bakaba biganjemo abirabura n’indi miryango mitoya.
