Nyakwigendera Boutros Boutros – Ghali wari UMunyamabanga Mukuru w’Umuryango w’Abibumbye mu gihe cya Jenoside, akaba aherutse kwitaba Imana, ngo yaba yaragize uruhare rukomeye mu guha intwaro ubutegetsi bwashyize mu bikorwa Jenoside Yakorewe Abatutsi mu 1994.
Ubwo yari akiri minisitiri w’ububanyi n’amahanga wa Misiri, Boutros-Ghali yoroheje amasezerano yo guha u Rwanda ibikoresho bya gisirikare mu 1990, intwaro zatwaye akayabo ka miliyoni 26$ zirimo imbunda zirasa bombe, izirasa rocket, amagrenade ndetse n’amasasu byavaga I Cairo biza I Kigali. Zimwe muri izi ntwaro nizo zakoreshejwe n’intagondwa z’Abahutu mu kwica Abatutsi n’Abahutu batavugaga rumwe n’ubutegetsi.
Uruhare rwa Boutros Ghali, wari ukuriye Loni ubwo jenoside yo muri 94 yatangiraga narwo rwagarutsweho mu gitabo cya Linda Melvern.
Muri iki gitabo cyiswe “ A People Betrayed: The Role of the West in Rwanda’s Genoside” , Boutros Ghali yemeye uruhare rwe mu kwemera kohereza intwaro mu Rwanda ku ikubitiro zaguzwe miliyoni 5,8$ mu 1990, ibintu byatumye Misiri ikomeza kujya igurisha intwaro u Rwanda kugeza mu 1992. Boutros Ghali yavugaga ko yabyemeye kubera ko kari akazi ke nka minisitiri w’ububanyi n’amahanga.
Aya masezerano yo kugura ibirwanisho mu Misiri nk’uko iyi nkuru yakozwe na The Guardian ivuga, kwagizwe ibanga cyane kuko izi ntwaro zinjiraga mu Rwanda zitwa ibikoresho by’ubutabazi. Icyo gihe amahanga akaba yarashinjaga ubutegetsi bwariho mu Rwanda guhonyora uburenganzira bw’ikiremwamuntu Abatutsi batari bacye bicwa.
Abajijwe ukuntu yemeye aya masezerano mu gihe nk’iki, Boutros Ghali yasubije ko atigeze atekereza ko imbunda ibihumbi bicye zari guhindura ibintu ku rwego byagezeho.
Tubibutse ko Boutros Boutros-Ghali yitabye Imana ku myaka 93 kuri uyu wa Kabiri tariki 16 Gashyantare 2016, aguye mu Bitaro bya Cairo. Yabaye Umunyamabanga Mukuru wa Loni kuva mu 1992 kugeza mu 1996, akaba yarakunze gushinjwa kunanirwa guhagarika jenoside mu Rwanda.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
