Abanyeshuri 2 baherutse gupfira mu mpanuka y’imodoka ku wa 19 Nzeri 2024, yari itwaye abanyeshuri yabereye mu Karere ka Nyamasheke bigaga ku ishuri rya St Matthews ishami rya Ntendezi bashyinguwe kuri uyu wa Gatandatu tariki ya 21 Nzeri 2024.
Aba bana baguye mu mpanuka y’imodoka yo mu bwoko bwa Toyota Hiace yatwaraga abanyeshuri b’ishuri ribanza riherereye mu Murenge wa Ruharambuga muri aka Karere ka Nyamasheke.Iyi mpanuka yanakomerekeyemo abandi banyeshuri 28, umushoferi, umukozi w’ishuri n’umunyegare.
Ubwo aba bana babiri baherekezwaga bwa nyuma, Umunyamabanga Nshingwabikorwa w’Itorero Anglican Diocese ya Cyangugu, Rev Iriho Boas yihanganishije abagizweho ingaruka n’iyi mpanuka.
Mupenzi Narcisse,Meya w’Akarere ka Nyamasheke, ahumuriza imiryango y’abakoreye impanuka muri iyi modoka, anasaba ko habaho ubufatanye mu gukurikirana uko abanyeshuri batwarwa ku mashuri dore ko byagaragaye ko iyi modoka yari itwaye abarenze ubushobozi bwayo.
Uretse ububoyozi bw’Akarere n’itorero ricunga ishuri aba bana bigagaho, guherekeza bwa nyuma banyakwigendera byitabiriwe n’Umuyobozi Mukuru w’urwego rushinzwe uburezi bw’ibanze, REB, Dr Mbarushima Nelson.
Mu bakomerekeye muri iyi mpanuka, 15 ubu bamaze gusubira mu miryango yabo, mu gihe abarimo umushoferi, umukozi w’iki kigo n’umunyegare wagonzwe bari kwitabwaho mu bitaro bya Bushenge, ibya Kibogora n’ibya Kaminuza bya Butare.
Ubuyobozi bw’Akarere bwasabye ko habaho ubufatanye bw’abatwara abana n’ababyeyi babo kugira ngo iyi serivisi inozwe kurushaho hakumirwa n’impanuka.
