Abaturage barenga 7000 ni bo bitabiriye ibikorwa byo kwamamaza abakandida depite batanzwe n’umuryango wa FPR Inkotanyi n’indi mitwe yifatanije na wo mu karere ka Nyamasheke , bikaba byabereye ku kibuga cy’umupira cya Nyamasheke kiri mu kagari ka Ninzi mu murenge wa Kagano bihuza bamwe mu banyamuryango ba FPR Inkotanyi baturutse mu mirenge yose uko ari 15 y’aka karere n’abaturage b’uyu murenge n’indi ihana imbibe na wo bakeje ibyiza bagezeho bakesha Umuryango wa FPR-Inkotanyi.
Nk’uko bamwe mu banyamuryango ba FPR Inkotanyi babitangarije Bwiza.com ngo gutora FPR Inkotanyi nta wabishidikanyaho akurikije aho ikuye igihugu n’aho ikigejeje mu myaka 24 gusa, akarere ka Nyamasheke ubwako kakaba karafunguriwe amarembo agana mu tundi turere twose tw’intara y’I Burengerazuba n’ahandi mu gihugu bitewe n’umuhanda wa kaburimbo bubakiwe mu myaka mike ishize, abagore bagakingurirwa amarembo y’iterambere n’ibindi byinshi.
Niyonshuti Joséphine w’imyaka 26 y’amavuko,utuye mu murenge wa Kanjongo,avuga ko mu mwaka mu gihe gito amaze atangiye ubucuruzi amaze kwiteza imbere mu buryo bukomeye,byose abikesha amahoro n’umutekano bituruka ku miyoborere myiza irangajwe imbere n’umuryango FPR Inkotanyi.
Yagize ati’’ kudatora FPR Inkotanyi ni ukunyagwa zigahera kuko nkanjye natangiriye ku mafaranga 20.000 gusa nari ngurishije ihene mu ntangiriro za 2017, ntangirira ku bucuruzi bw’amavuta yo kwisiga, ndihuta cyane nunguka umunsi ku munsi,ubu mfite uruganda rukora ibikoresho by’isuku rufite agaciro ka miliyoni 30 z’amanyarwanda, nkagira imodoka y’agaciro ka 7.000.000 imfasha mu bucuruzi n’inzu mbamo y’agaciro ka 5.500.00.’’
Yakomeje agira ati’’ byose mbikesha FPR Inkotanyi yahagaritse Jenoside ikaduha amahoro n’umutekano n’abagore ikaduteza imbere kuko ubu nkoresha abakozi barenga 20 n’umugabo wanjye akaba aza tugafatanya muri ubu bucuruzi tukiteza imbere.’’
Komiseri muri FPR Inkotanyi ushinzwe kurwanya Jenoside n’ingengabitekerezo yayo Mwiza Espérance na Senateri Mushinzimana Appolinaire bashimiye abanyamuryango ba FPR Inkotanyi imbaraga bahagurukanye banashimira abaturage muri rusange ubwitabire muri iki gikorwa,bavuga ko gutora FPR ari uguhitamo gukomeza umuvuduko w’iterambere utarigeze ugabanuka na gato mu myaka 24 ishize,kandi ibyagezweho bikaba bizikuba inshuro nyinshi cyane, kuko uruhare rw’umudepite mu iterambere ry’igihugu ari runini cyane.
Uhagarariye ibikorwa byo kwamamaza abakandida depite b’umuryango FPR Inkotanyi n’indi mitwe ya politiki yishyize hamwe na wo muri aka karere Habyarimana Jovite,yavuze ko abakandinda biyeretse abaturage ari 2 ari bo Uwamariya Rutijanwa Pélagie na Pasiteri Senani Benoit,bakaba bagombaga kuba 3 ariko uwagombaga kuza aturutse mu mutwe wa politiki PSR Bitsindinkumi Innocent akaba ngo yagize impamvu zituma ataboneka,icyakora ngo ahandi bazakomereza mu mirenge akazabonekamo.
Yasabye abanyamuryango ba FPR Inkotanyi mu mirenge hirya no hino igize aka karere guha ingufu iki gikorwa nk’uko byakozwe mu ntangiriro kugeza ibikorwa byo kwiyamamaza by’abakandida bisojwe muri aka karere ku wa 31 uku kwezi,bakazanitabira ari benshi amatora y’abadepite bazazindukira mo ku wa 3 Nzeri.
