Lellie Carelle Ndayizeye ni we waraye wegukanye ikamba rya Nyampinga w’u Burundi wa 2023, asimbuye Kelly Ngaruko wari urimaranye umwaka.
Ndayizeye wari uhagarariye intara ya Bubanza, yegukanye ikamba rya Nyampinga w’u Burundi ahigitse abakobwa 11 bari bahuriye mu cyiciro cya nyuma cya Miss Burundi 2023.
Ibirori byo kumushyikiriza ikamba byabereye mu mujyi wa Bujumbura, byitabirwa n’abarimo Angeline Ndayubaha, Madamu wa Perezida Evariste Ndayishimiye w’u Burundi.
Ni Madamu wa Ndayishimiye watanze icyizere cyo gukomeza gushyigikira ririya rushanwa, mbere yo gusaba abaryitabira guhuza imbaraga mu rwego rwo kugera ku ntego zabo.
Mu bo Miss Ndayizeye yahigitse harimo Ngabirano Belle Ange Edissa wari uhagarariye intara ya Gitega wabaye igisonga cya mbere.
Igisonga cya kabiri cya Nyampinga w’u Burundi yabaye Keza Blandine wari uhagarariye intara ya Muramvya, mu gihe Nyampinga wakunzwe kurusha abandi ari Tricia Ricky Uwera wo mu ntara ya Kirundo.
Nyampinga mushya w’u Burundi nyuma yo kwegukana ikamba yahawe imodoka yo mu bwoko bwa Toyota Ractis, litiro 480 za lisansi, ubwishingizi bw’imodoka, azajya akorerwa imodoka, yishyurirwe amashuri, anagenerwe umushahara ngarukakwezi wa 500,000 Fbu.
Igisonga cya Mbere cyo cyagenewe 2.500.000 Fbu, Igisonga cya Kabiri kigenerwa 2.000.000 Fbu na ho Nyampinga ukunzwe na benshi (Miss Popularity) ahabwa 1.000.000 Fbu.
