Nyuma ya M23, kuri ubu FARDC irafata imitwe ya Mai-Mai nk’imitwe y’iterabwoba

Igisirikare cya Repubulika ya Demokarasi ya Congo (FARDC) cyatangaje ko kiyemeje gufata imitwe yose ya Mai-Mai ikorera i Beni na Lubero nk’imitwe y’iterabwoba. Ibi cyabitangaje kuri uyu wa Gatatu, itariki ya 8 Kamena 2022, nyuma y’ibitero byinshi by’iyi mitwe yitwaje intwaro byibasiye abasivili ndetse n’ibirindiro by’ingabo. Ni nyuma y’aho umutwe wa M23 umaze iminsi uhanganye na FARDC nawo uherutse gushyirwa mu rwego rw’imitwe y’iterabwoba na Guverinoma ya Congo.

FARDC yagize iti: “Imitwe yose ya Mai-Mai ikorera mu karere ka Beni na Lubero ubu irafatwa nk’imitwe y’iterabwoba kandi izafatwa nka ADF nibadashyira intwaro hasi”.

Ku muvugizi w’ibikorwa bya gisirikare bya Sokola 1 mu ntara ya Kivu y’Amajyaruguru, Capt. Anthony Mwalushay, iyi mitwe yitwaje intwaro irahamagarirwa gushyira intwaro hasi cyangwa guhitamo guhigwa bukware.

Yakomeje igira iti: “Ibi ni ko bimeze muri Sheferi ya Bashu aho, ejobundi, ingabo zishe abarwanyi ba Mai-Mai Mazembe bifuzaga gutera ibirindiro bya gisirikare, no gucengera mu guhungabanya abaturage.

Mu bihe byashize ntitwigeze tugirira impuhwe bagenzi bacu bari mu mitwe yitwaje intwaro: ni ugushyira intwaro hasi ukinjira mu nzirayo kwamburwa intwaro, cyangwa se ugafatwa nk’umuterabwoba hanyuma ukicwa. ”

Muri Teritwari ya Lubero nk’uko iyi nkuru dukesha politico.cd ivuga, Capt. Anthony Mwalushay, avuga ko hakiri umutwe wa Mazembe wasinyanye amasezerano n’umutwe w’iterabwoba wa ADF-MTM kugira ngo batangire kwibasira ingabo.

Ati: “Nyuma ya Kyandenga, ubu Mazembe yasinyanye n’abaterabwoba. Muraza gusobanukirwa ko inshuti zacu, abenegihugu bagenzi bacu biyemeje kugirira nabi abenegihugu bagenzi babo ba Congo. Ntabwo twumva icyo bunguka muri ibi byose. Ariko iyo ibyo bidafashe, ingabo ntizigera zirambirwa, yaba ADF, Mai-Mai, ntawe udutera ubwoba! ».