OMS ihamya ko Afurika ititeguye urukingo rwa Covid-19, mu gihe rwaba rubonetse

Bigaragara mu itangazo rigenewe itangazamakuru, uyu muryango washyize hanze kuri uyu wa 26 Ugushyingo 2020, ubwo Dr. Matshidiso Moeti uwuhagarariye muri Afurika yavugaga ku rwego Afurika igezeho yitegura kwakira urukingo rwa Covid-19 rushobora kuboneka muri Mutarama 2021.

OMS yavuze ko yahaye ibihugu 47 bya Afurika amabwiriza agaragaza ibishingirwaho mu kumenya uko igihugu cyiteguye gukwirakwiza uru rukingo (Vaccine Readiness Assessment Tool), 40 muri byo bigagara ko biri ku gipimo cyo hasi cyane cya 33%, mu gihe igipimo cyifuzwa ari 80%.

Kubera iyi mpamvu, Dr. Moeti yasabye Afurika guhaguruka ikitegura bihagije uburyo izakira, ikanakwirakwiza urukingo rwa Covid-19 mu gihe rwaba rubonetse. Ati: “Igikorwa cyo gukwirakwiza inkingo nyinshi mu mateka ya Afurika kiri hafi gutangira, Leta zo muri Afurika nazo zirasabwa kwihutisha imyiteguro.”

Nk’uko Dr. Moeti yabivuze, icyo leta zo muri Afurika zisabwa mbere y’uko uru rukingo ruboneka, ni ugukora ubukangurambaga mu baturage, gushaka amafaranga yo kurugura, gushyiraho amabwiriza arugenga, gutegura uburyo bwo kurukwirakwiza, gushaka uburyo ruzarindirwa umutekano n’ibindi.

Kugira ngo urukingo rwa Covid-19 rugere muri Afurika, OMS ivuga ko bizatwara amadolari ya Amerika agera kuri miliyari 5.7, hakiyongeraho hagati ya 15 na 20% yayo, azagendera ku buryo bwo kurugeza kuri uyu mugabane no kurutera abaturage.