Perezida Paul Kagame yakoze impinduka muri Guverinoma zasize ashyizeho abaminisitiri bashya bane ndetse n’abanyamabanga ba Leta batandatu.
Ni impinduka zigaragarira mu itangazo ryasohowe n’Ibiro bya Minisitiri w’Intebe kuri uyu wa Kabiri tariki ya 22 Kanama 2023.
Abahawe imirimo barimo Twagirayezu Gaspard wagizwe Minisitiri w’Uburezi, asimbuye Dr Uwamariya Valentine wari muri izo nshingano kuva muri Gashyantare 2020.
Uwamariya yagizwe Minisitiri w’Uburinganire n’iterambere ry’Umuryango, asimbuye kuri uwo mwanya Prof. Bayisenge Jeannette wagizwe Minisitiri w’abakozi ba Leta n’Umurimo. Ni inshingano yasimbuyeho Fanfan Rwanyindo wari uzirimo kuva muri 2017.
Twagirayezu yari asanzwe ari Umunyamabanga wa Leta muri Minisiteri y’Uburezi. Yasimbuwe kuri izi nshingano na Claudette Irere wari usanzwe ari Umunyamabanga wa Leta ushinzwe Ikoranabuhanga n’Amashuri y’Imyuga n’Ubumenyingiro muri Minisiteri y’Uburezi.
Mu zindi mpinduka ni uko Maj Gen Albert Murasira wahoze ari Minisitiri w’Ingabo yagizwe Minisitiri ushinzwe ibikorwa by’ubutabazi.
Murasira yasimbuye kuri uwo mwanya Kayisire Solange wagizwe Umunyamabanga wa Leta muri Minisiteri y’Ubutegetsi bw’Igihugu.
Mu zindi mpinduka Rwigamba Eric yagizwe Umunyamabanga wa Leta muri Minisiteri y’Ubuhinzi n’Ubworozi, asimbuye Dr Musafiri Ildephonse wari muri izo nshingano kuva muri Kanama umwaka ushize.
Dr Claudine Uwera we yagizwe Umunyamabanga wa Leta muri Minisiteri y’ibidukikije, Jeanine Munyeshuli agirwa Umunyamabanga wa Leta muri Minisiteri y’Imari n’Igenamigambi ushinzwe ishoramari rya Leta no kwegeranya imari na ho Sandrine Umutoni wari umuyobozi w’umuryango Imbuto Foundation kuva muri 2016 agirwa Umunyamabanga wa Leta muri Minisiteri y’Urubyiruko.
Usibye ba Minisitiri bashya b’abanyamahanga ba Leta, Umukuru w’Igihugu yanashyizeho ba Ambasaderi b’u Rwanda mu bihugu bitandukanye.
Aba barimo Maj Gen (Rtd) Dr Charles Rudakubana wagizwe Ambasaderi uhagarariye u Rwanda muri Angola na Margaret Nyagahura wagizwe Ambasaderi uhagarariye u Rwanda muri Hongrie.
Ingabire Assumpta we yagizwe Umuyobozi Mukuru w’Ikigo gishinzwe kurengera umwana, na ho Umutoni Gatsinzi Nadine agirwa Umuyobozi Mukuru w’Urwego Rushinzwe kugenzura iyubahirizwa ry’uburinganire hagati y’abagabo n’abagore mu iterambere ry’igihugu.
