Paul Rusesabagina w’imyaka 66 y’amavuko ari mu mfungwa n’abagororwa bafungiwe muri Gereza ya Mageragere mu Karere ka Nyarugenge batewe urukingo rwa Covid-19 kuri uyu munsi wa gatanu w’ikingira ku rwego rw’igihugu.
Nk’uko Urwego rw’Igihugu rushinzwe imfungwa n’abagororwa (RCS) rwabitangaje, iri kingira ryabereye muri Gereza ya Mageragere kuri uyu wa 9 Werurwe, ryakorewe abari mu byiciro by’abarusha abandi ibyago byo kwandura cyangwa kuzahazwa n’iki cyorezo.
Minisiteri y’Ubuzima ivuga ko uyu munsi muri iyi gereza hakingirwa imfungwa n’abagororwa barenga 2300; bangana na ¼ cy’abayibamo.
Inzego zishinzwe ubuzima zaba izo mu Rwanda na mpuzamahanga zivuga ko abafite ibyago byo kwandura no kuzahazwa n’iki cyorezo, barimo abafite imyaka 65 kuzamura. Rusesabagina ari muri iki cyiciro.
Paul Rusesabagina afungiwe muri iyi gereza, akurikiranweho ibyaha by’iterabwoba byakozwe n’abarwanyi b’umutwe witwaje intwaro wa FLN urwanya Leta y’u Rwanda, ukaba ushamikiye ku ihuriro mpuzamashyaka rya MRCD-Ubumwe yari abereye umuyobozi.
Ifoto: Ingabire M. Immaculée
Kurikira ibiganiro n’amavidewo binyura kuri Bwiza TV
