Umuryango mpuzamahanga w’itangazamakuru rikora ubucukumbuzi ku byaha bitegurwa n’ibya ruswa, OCCRP uvuga ko Leta y’u Rwanda yaba yaba yaragerageje gukurikirana telefone za bamwe mu bakomeye mu bihugu by’akarere n’abandi barimo umukobwa wa Paul Rusesabagina, Carine Kanimba, rwifashishije ‘application’ yitwa Pegasus.
Ni amakuru uyu muryango ukesha ubushakashatsi uvuga ko wakoze hamwe n’itsinda ry’abanyamakuru bahurijwe hamwe n’igitangazamakuru Forbiden Stories; iki kikaba cyarahishuye ko cyabonye urutonde rwari ibanga ruriho nimero za telefone 50,000 mu bihugu bitandukanye zabageregeje kwinjirirwa, yaturutse mu kigo NSO Group cyo muri Israeli cyakoze Pegasus.
OCCRP igira iti: “Abanyamakuru babashije kumenya nimero z’Abanyarwanda n’abandi bantu u Rwanda rukeneyeho amakuru bo mu bihugu bituranye. Aba barimo impirimbanyi, abanyamakuru, impunzi n’abayobozi muri za guverinoma.”
Kuri Carine Kanimba, OCCRP ivuga ko u Rwanda rwagerageje gukurikirana telefone ye hifashishije Pegasus kuva muri Mutarama kugeza tariki ya 3 Nyakanga 2021, ibi bikaba byarashimangiwe n’iperereza rya gihanga ryakozwe n’ishami ry’umuryango Amnesty International uharanira uburenganzira bw’ikiremwmauntu rishinzwe umutekano mu by’ikoranabuhanga, Security Lab.
Ngo ibyo byabaye mu gihe Kanimba yari mu bukangurambaga busaba ko se ufungiwe mu Rwanda kuva muri Kanama 2020, yafungurwa. Aho yahuraga n’adepite batandukanye ku mugabane w’Uburayi, abadipolomate, ndetse na Minisitiri w’Ububanyi n’Amahanga w’u Bubiligi, Sophie Wilmès tariki ya 14 Kamena 2021.
Abakomeye bo mu bihugu by’akarere uyu muryango uvuga ko u Rwanda rwaba rwaragerageje gukurikirana telefone zabo rwifashishije Pegasus barimo abo mu Burundi, Uganda na Repubulika ya Demukarasi ya Congo (RDC).
Muri bo haravugwamo uwahoze ari Minisitiri w’Intebe wa Uganda, Ruhakana Rugunda, Sam Kutesa wabaye Minisitiri w’Ububanyi n’Amahanga wa Uganda, Gen. David Muhoozi wabaye Umugaba Mukuru w’Ingabo za Uganda, Joseph Okwet ukora mu rwego rw’iperereza rwa Uganda n’umunyapolitiki Fred Nyanzi Ssentamu.
Haravugwamo kandi Minisitiri w’Intebe w’u Burundi, Alain Guillaume Bunyoni ubwo yari Minisitiri w’Umutekano w’Imbere.
Usibye telefone ya Carine Kanimba OCCRP ivuga ko yakurikiranwe bigakunda, ntibizwi niba n’izaba bakomeye mu karere byarakunze. Gusa uyu muryango uvuga ko icukumbura aba banyamakuru bakoze, ryagaragaje ko mu 50,000 zakurikiranwe, iziri ku kigero cya 83% byakunze.
U Rwanda ruhakana ibyo gukurikirana telefone z’abandi
Mu 2019, nabwo u Rwanda rwashinjwe gukurikirana telefone z’abantu batandukanye rwifashishije Pegasus. Gusa icyo gihe Umukuru w’Igihugu, Paul Kagame yasobanuriye itangazamakuru ko rudafite ubushobozi bwo kuyikoresha kuko ihenze cyane.
Minisitiri w’Ububanyi n’Amahanga w’u Rwanda, Dr Vincent Biruta na we yigeze kubihakana, avuga ko nta buhanga iki gihugu gifite bwo kuyikoresha. Yagize ati: “U Rwanda ntirukoresha iyi porogaramu kandi ntabwo rufite ubwo ubuhanga mu buryo ubwo ari bwo bwose.”
Dr Biruta yavuze ko ababirushinja babambiriye guteranya u Rwanda n’amahanga. Ati: “Ibyo birego i ibinyoma bigamije guharabika u Rwanda ku rwego mpuzamahanga ndetse no guteza urujijo mu barutuye.”
NSO Group ibyamaganira kure
NSO Group nyuma yo kubona amakuru yashyizwe hanze na Forbiden Stories, yihutiye gusohora itangazo riyanyomoza, yemeza ko ari igihuha kidafite ishingiro.
Iki kigo cyatangaje kiti: “Ibyatangajwe na Forbiden Stories byuzuyemo ibinyoma n’ibitekerezo bituma hakemangwa ku kwizerwa no ku nyungu z’ababitangaje. Birasa n’aho abatazwi basakaje amakuru adafite ishingiro, kandi ari kure y’ukuri.”
Iki kigo cyasobanuye ko kigurisha ikoranabuhanga ryacyo ku nzego zishinzwe gukurikirana ishyirwa mu bikorwa ry’amategeko n’iz’iperereza, hagamijwe gusa gukiza ubuzima bw’abantu binyuze mu gukumira ibyaha nko gucuruza abantu, ibiyobyabwenge, ubushimusi, ibikorwa by’iterabwoba, gutahura aho abagwiriwe n’inzu baherereye no kurinda ibibuga by’indege kwinjirirwa n’utudege duto dushobora kubihungabanya. Ivuga ko yo nta bubasha igira bwo gukoresha iri koranabuhanga, ndetse ngo nta n’amakuru y’abantu ireba.
