Ubwo yasozaga uruzinduko yakoreraga mu Ntara y’Amajyaruguru n’Uburengerazuba, Perezida wa Repubulika Paul Kagame yasabye abaturage b’Akarere ka Rubavu yasuye, kureka kurangara, ahuwo ko bakwiye gushishikarira gukora cyane bakiteza imbere.
Perezida Kagame yakiriwe n’ibihumbi by’abaturage b’akarere ka Rubavu na Rutsiro bari bateraniye mu Murenge wa Nyamyumba [Rubavu], kuri uyu wa Gatanu tariki ya 10 Gicurasi 2019. Abatuye muri ibi bice by’igihugu by’Uburengerazuba akaba yabasabye kandi gukorera hamwe kugira ngo u Rwanda rukomeza rube intangarugero.
Yagize ati “Abantu bareke kurangara, twikorere, twiteze imbere, dukorere hamwe, igihugu cyacu gikomeze kibe intangarugero kuko kimaze kuba intangararugero mu iterambere no mu buryo gitera imbere”.
Nk’uko yari amaze kubasaba kutarangara, yanongeyeho ko bagomba gukorana umwete, ati “Bantu mwese muri hano mukore. Abikorera kandi bishoboye bamenye ukuntu bakorana n’abandi bakora utuntu duto ariko tubatunze kugira ngo babateze imbere. Nimushyiraho umwete mugakora, uyu mujyi n’ibyaro bikamera neza nta kibazo tuzakomeza gutera imbere.”
Ku birebana n’umutekano dore ko muri aka karere hakunze kugabwa ibitero n’abitwaje intwaro rimwe na rimwe bigatangazwa ko ari abaturutse mu bihugu by’ibituranyi, Perezida Kagame yaburiye ababigerageza agira ati “Uwashaka guhungabanya umutekano wacu ajye atekereza kabiri mbere yo kubijyamo. Akenshi bihera mu magambo gusa. Barabivuga cyane kurusha uko babikora.”
Iby’amavuriro, imihanda, amashyanyarazi, itumanaho, uburezi, ubuzima n’ibindi byose by’imibereho myiza y’abaturage yavuze ko ubuyobozi burakomeza kubikurikirana uko bikwiye.
Rwari uruzinduko rw’iminsi itatu yakoreraga mu Majyaruguru n’Uburengerazuba, ku munsi wa mbere yasuye akarere ka Burera, uwa kabiri yari i Musanze aho yaganiriye n’abaturage b’aka Karere hamwe n’ab’aka Nyabihu, arusoreza i Rubavu. Utu duce tw’igihugu akaba yaduherukagamo ubwo yiyamamazaga mu 2017.
AMAFOTO : Village Urugwiro
Â
