Perezida wa Repubulika y’u Rwanda, Paul Kagame n’Umunyamabanga Mukuru wa Commonwealth, Rt Hon. Patricia Scotland, kuri uyu wa 31 Mutarama 2022 bemeje ko inama izahuza abakuru n’ibihugu na za guverinoma z’uyu muryango izwi nka CHOGM iteganyijwe i Kigali izaba guhera tariki ya 20 Kamena 2022.
Iyi nama ikomeye muri Commonwealth bwa mbere byari byarateganyijwe ko yari izabera i Kigali muri Kamena 2020, icyo gihe irasubikwa mu rwego rwo gukumira ikwirakwira ry’icyorezo cya Covid-19, yimurirwa mu 2021 nabwo irasubikwa bitewe na Covid-19.
Kuri ubu, Perezida Kagame yahaye ikaze abazitabira iyi nama, avuga ko izaba umwanya wo kuganiriraho no guha umurongo ibibazo byatewe na Covid-19, no kubaka ikorabuhanga rishya hamwe n’amahirwe y’ubukungu, byafasha mu gukemura ibibazo abaturage b’ibihugu bigize uyu muryango bahura nabyo.
CHOGM iheruka yebereye i Londres mu 2018. Isanzwe iba rimwe mu myaka ibiri.
