Perezida Ruto yasengeye ingabo za Kenya zigiye muri RDC

Perezida wa Kenya, William Ruto, yasengeye ingabo z’iki gihugu zigiye koherezwa mu burasirasuba bwa Repubulika ya Demukarasi ya Congo (RDC) kurwanya imitwe yitwaje intwaro ihungabanya umutekano waho.

Ni igikorwa cyabaye kuri uyu wa 2 Ugushyingo 2022 ubwo yari mu gace ka Embakassi Garrison mu muhango wo gushyikiriza izi ngabo zo mu mutwe udasanzwe ibendera ry’igihugu, mbere yuko zifata urugendo.

Perezida Ruto yasabye Imana kuzarinda aba basirikare mu gihe bazaba bari mu kazi kabajyanye muri RDC, ayibutsa ko bagiye kurinda ubuzima bw’abaturage, aboneraho kubasabira ubwenge.

Uyu Mukuru w’Igihugu yamenyesheje izi ngabo ko yakurikiranye imyitozo zakoze zitegura kujya muri RDC, ko afite icyizere ko zizakora akazi nea, azizeza ko we n’Abanyakenya bazakomeza kuzisengera. Ati: “Turabashyigikiye kandi turakomeza tubasengere.”

Perezida Ruto yatangaje ko mbere y’amasaha 48 ngo ashyikirize izi ngabo ibendera ry’igihugu, yabanje kuvugana n’Umunyamabanga Mukuru w’Umuryango w’Abibumbye ndetse n’abayobozi b’ibihugu byo mu karere, bamwemerera kuzohereza.

Izi ngabo zizayoborwa na Colonel Daniel Rotich.