Perezida wa Leta Yunze Ubumwe ya Tanzania, Samia Suluhu Hassan, yamaze gushyiraho itsinda ry’impuguke rizakora ubushakashatsi ku cyorezo cya Covid-19 muri iki gihugu, buzashingirwaho mu gufata ingamba nshya zo kucyirinda.
Perezida Suluhu yabitangarije mu mujyi wa Dodoma kuri uyu wa 25 Mata 2021 mu ihuriro n’abanyamadini n’amatorero, ryo kwibukiramo nyakwigendera Dr John Pombe Magufuli wayoboraga iki gihugu.
Ati: “Nk’uko nabibasezeranyije mu irahira ry’abanyamabanga bahoraho n’ababungirije, namaze gushyiraho itsida ry’impuguke. Ndateganya guhura n’abarigize ndetse n’abahagarariye Minisiteri y’Ubuzima n’iy’Imari n’Igenamigambi kugira ngo igikorwa gitangire.”
Uyu Mukuru w’Igihugu yasezeranyije abitabiriye iri huriro n’abaturage ba Tanzania ko azabamenyesha amakuru izi mpuguke zizajya zibona mu bushakashatsi, hanyuma agafata ingamba zivana igihugu mu ngaruka z’iki cyorezo.
Yanasabye kandi abayobozi b’amadini n’amatorero kwigisha abayoboke babo kuri iki cyorezo kugira ngo bamenye kucyirinda, bashingiye ku byo inzego zishinzwe ubuzima n’abashakashatsi basaba birimo: gukaraba intoki n’isabune, gukoresha imiti yica udukoko, guhana intera no kwambara agapfukamunwa.
Tariki ya 6 Mata 2021 ni bwo uyu Mukuru w’Igihugu ubwo yari kuri Televiziyo y’Igihugu, yasezeranyije abaturage ko agiye gushyiraho iri tsinda ry’impuguke.
Soma iyi nkuru bifitanye isano https://bwiza.com/?Perezida-Suluhu-agiye-gukora-amavugurura-mu-kurwanya-Covid-19
Kurikira ibiganiro n’amavidewo binyura kuri Bwiza TV
