Perezida wa Afurika y’Epfo, Cyril Ramaphosa, yategetse ko hakorwa iperereza ryihariye ku byatumye Abanyafurika y’Epfo 17 bajyanwa mu bikorwa bisa n’iby’abacanshuro mu ntambara iri hagati y’Uburusiya na Ukraine.
Nk’uko itangazo rya guverinoma ribivuga, abo basore bari hagati y’imyaka 20 na 39, bakaba bafungiwe mu karere ka Donbas muri Ukraine, nyuma yo kubeshywa ngo bagiye kubona akazi keza.
Guverinoma yavuze ko yakiriye amasengesho yo gutabarwa aturutse kuri abo baturage, ikaba iri gukora ibishoboka byose kugira ngo babagarure mu gihugu.
Itangazo rya guverinoma rigira riti: “Perezida Cyril Ramaphosa yategetse iperereza ku byatumye aba basore bajyanwa muri ibyo bikorwa bisa n’iby’abacanshuro.”
Ntiharamenyekana uruhande abo Banyafurika y’Epfo barwaniragamo muri iyo ntambara, ariko amategeko y’igihugu abuza abaturage bose kujya mu ngabo z’amahanga cyangwa gukora ibikorwa bya gisirikare by’amahanga batabiherewe uburenganzira na Leta.
Mu kwezi kwa Kanama, guverinoma y’Afurika y’Epfo yari yaburiye urubyiruko kwitondera akazi katangwaga ku mbuga nkoranyambaga ko kujya gakorera muri Uburusiya.
Iri perereza rizibanda ku buryo abo basore babashije kugerwaho n’ayo makuru y’akazi, uwabashishikarije kwinjira muri ayo masezerano, n’uruhare rw’amatsinda ashobora kuba ari inyuma y’ibi bikorwa.
Guverinoma ivuga ko iri gukorana n’inzego za dipolomasi n’abahagarariye Afurika y’Epfo mu bihugu birebwa n’ibi bibazo, kugira ngo harebwe uko abo baturage basubizwa mu gihugu amahoro.
