Perezida wa Madagascar, Andry Rajoelina, yavuze ko atazafata urukingo rwa covid-19 na rumwe mu ziri kwifashishwa muri iki gihe, ahubwo ko azakoresha umuti gakondo watunganyirijwe mu gihugu cye.
Nk’uko Ibiro Ntaramakuru by’Abafaransa (AFP) byabitangaje, uyu Mukuru w’Igihugu tariki ya 20 Werurwe 2021 yagize ati: “Ku bwanjye, ntabwo ndakingirwa ndetse nta gahunda mfite yo gufata urukingo.”
Perezida Rajoelina yavuze ko mu gihe Madagascar itaratangira gukingira, bigaragara ko inkingo ziri gukoreshwa zigira ingaruka zirimo kuribwa mu mutwe n’umunaniro.
Kuri we kuba yiyemeje gukoresha umuti w’iwabo, ngo ni ukugira yirinde hamwe n’umuryango we. Gusa yongereyeho ko “Leta ya Madagascar itarwanya urukingo rwa Covid-19.”
Muri Mata 2020 ni bwo Perezida Rajoelina yamuritse “umuti Covid-19″ witwa Covid-Organics wakozwe n’abashakashatsi b’iwabo mu kimera cyitwa Artemisia.
Icyo gihe yatangaje ko ari umuti wizewe, cyane ko mu bantu wakoreweho igerageza byagaragaye ko wabarinze iki cyorezo, gusa ntabwo inzego nka OMS zigeze ziwemeza.
Madagascar yatangiye guha ibihugu bitandukanye bya Afurika uyu muti, ariko byaje kuwutakariza icyizere bitewe n’uko ntacyo wabifashije mu rugamba rwo kurwanya iki cyorezo.
Kurikira ibiganiro n’amavidewo binyura kuri Bwiza TV
