Perezida Xi Jinping avuga ko umugambi we w’inzira n’imihanda bizenguruka isi ugomba guhuza ubukungu bw’Isi, ubusumbane bwari burimo bukavaho. Yabitangarije mu nama mpuzamahanga ya kabiri iganira ku bikorwa remezo ayoboye mu Bushinwa.
Iyi nama ibaye ku ncuro ya kabiri, nyuma y’iyabaye mu 2017. Iy’uyu
mwaka yitabiriwe n’ibihugu bisaga 150 bivuye ku migabane yose y’isi, Perezida w’iki gihugu akaba avuga ko umugambi we uzahindura byinshi ku bukungu bw’Isi.
Perezida Xi Jinping, yagize ati ” Umugambi w’inzira n’imihanda bizenguruka isi(ceinture et route) ugamije mbere na mbere kongera ubwiza n’ubwinshi bw’ibigurishwa, no gukurura abaguzi bashya. Nibwo buryo bwonyine bwo guhangana n’ibibazo by’ubusumbane ubukungu bw’isi bufite”, Xi Jinping.
Wang Botao, Umunyamakuru wa televiziyo CGTN ishami ry’igifaransa, avuga ko koroshya ubucuruzi hagati y’ibihugu ari imwe mu nzira zatangijwe n’ubushinwa, mu rwego rwo guhangana n’ibibazo by’ubukungu. Ni naho Jinping agaruka kuri ariya amagambo, atanga umurongo ngenderwaho w’umugambi, “ceinture et route”.
Igihugu cy’Ubushinwa bwashoye amadolari arenga miliyari 80, ibi ngo byatumye haboneka imirimo isaga ibihumbi 244. Ibihugu byashowemo byahungukiye umusoro urenga miliyari ebyiri z’amadolari y’America. Ibigo by’abashinwa kandi nabyo byahawe amasezerano yo gukora imirimo inyuranye muri ibyo bihugu, kuburyo havuyemo amadolari agera kuri miliyari 500.
Avuga kandi ko imbumbe y’ibyinjira n’ibisohoka hagati y’Ubushinwa n’ibyo bihugu, yarenze miliyari ibihumbi birindwi bw’amadolari muri iyo myaka itandatu gusa.
Botao arakomeza agira ati “urebye ubu ibintu byarahindutse, ntibikiri bya bindi byo kohereza za mudasobwa na telefoni ngendanwa. Hagiye hiyongeraho imyambaro, umuceri, imodoka n’ibyuma byazo, imivinyo n’ibindi biribwa.
Perezida Jinping yabwiye abari mu nama mu mwaka wa 2018, i Bo’ao ko umugambi “ceinture et route” ari uruvugiro rw’isi. Ati, “ uru ruvugiro rugomba guhuza ubukungu bw’isi, hagamijwe imibereho myiza y’abayituye”.
Mu mwaka wa 2018 wonyine, amakontineri asaga 3600 yoherejwe hanze y’Ubushinwa, harimo n’ibihugu 15 by’i Burayi. Aya mato yageze mu mijyi isaga 50 ku isi. Hubatswe ibyambu bya Gwadar muri Pakistan na Hambantota muri Sri-Lanka, hashyirwaho inzira zaa Gari ya moshi Mombasa-Nayirobi muri Kenya, n’ihuza Ubushinwa na Laos.
Botao avuga ko Ubushinwa kandi bumaze gusinyana amasezerano n’ibihugu bisaga 62 ku isi ajyanye n’ubwikorezi bwo mu kirere, aho bwohereza indege mu birenze 45 hakoreshejwe inzira 403.
