Kuri uyu wa 10 Kanama 2016 ubwo hizihizwaga umunsi Nyafurika wo kwegereza abaturage ubuyobozi n’ubushobozi ku rwego rw’igihugu, umunsi wabereye mu karere ka Gakenke, Prof Shyaka Anastase uyobora Ikigo cy’Igihugu cy’Imiyoborere (RGB) yasabye abayobozi b’inzego z’ibanze guha umwanya abaturage bakagira uruhare mu bibakorerwa kuko bikiri ku kigero cyo hasi.
Umunsi Nyafurika wo kwegereza abaturage ubuyobozi n’ubushobozi ku rwego rw’igihugu wanahuriranye n’igikorwa cyo gutangiza imurikabikorwa ry’abafatanyabikorwa b’Akarere ka Gakenke nabyo biri mu bigaragaza ukwegereza abaturage ubuyobozi.
Umuyobozi w’Akarere ka Gakenke Nzamwita Deogratias, yagaragaje ko abaturage b’akarere ayoboye begerejwe ubuyobozi nta muturage ugisiragira ajya ku karere ashaka serivisi zitandukanye, byanakuye abanyagakenke benshi mu bukene.
Ibyavuzwe n’umuyobozi w’Akarere ka Gakenke byanashimangiwe n’abaturage baho bemeza ko begerejwe ubuyobozi bitewe n’uko abaturage ngo serivisi zitandukanye bazibona bitabasabye gisiragira ngo bakore urugendo rurerure.
Kurubone Felecien yagize ati “Ubuyobozi bwaratwegereye tujya ku kagari tukabona ibyangombwa, wajya ku murenge nabwo bakabiguha, ntugisiragira kuri komini.”
Umuyobozi wa RGB, Prof Shyaka Anastase yongeye kwibutsa Abanyarwanda ko gahunda yo kwegereza ubuyobozi abaturage ishingiye ku baturage n’ubundi, bityo bakaba bagomba kuyiboneramo imibereho myiza.
Prof Shayaka Anastase kandi yabwiye abayobozi b’inzego z’ibanze ko kwegereza abaturage ubuyobozi bitavuze kubaha serivisi zibegereye gusa ariko kandi ngo ni na ngombwa ko nabo bagira uruhare mu bibakorerwa, ibintu bisa n’ibyananiye bamwe mu bayobozi b’inzego z’ibanze.
[xyz-ihs snippet=”google-pub”]
Yagize ati “Nk’uko umuyobozi w’akarere yabivuze, ari ugufata abaturage neza, ari ukubaha serivisi nziza, ariko abaturage si ukubafata neza gusa nabo bagomba kugira ijambo iryo jambo rigomba kugaragarira mu kugira uruhare mu bibakorerwa, kugira uruhare mu kubumbatura umutekano wabo, kugira uruhare mu bikorwa by’iterambere…”
Guha umwanya abaturage bakagira uruhare mu bibakorerwa biracyari hasi cyane kuko imibare igaragaza ko Uruhare rw’abaturage mu bibakorerwa biri ku kigero cya 51%, uburyo Abanyarwanda bavuga ko bagira uruhare mu mihigo biri hasi ya 50%, abaturage bagize uruhare mu igenamigambi ry’akarere bo bari hasi ya 30%.
Kanda hano ujye ubona amakuru yihuse kandi kugihe kuri Facebook no kuri twitter
Zamubandi Saido/Bwiza.com
