PSG vs Basaksehir: Umusifuzi yatutse umwirabura, abakinnyi bose bava mu kibuga

Pierre Webo wabaye rutahizamu wa Cameroon, ubu ni umutoza wungirije wa Basaksehir. Umusifuzi ushinjwa kumutuka ni umunya-Romania Sebastian Coltescu, bikaba byavuyemo guterana amagambo hagati yabo bombi.

Mbere y’uko biba, umusifuzi wo gahati Ovidiu Haltegan yemeje ikosa hanyuma Webo ntiyaryemera. Uyu musifuzi yabajije mugenzi we Coltescu uwinubiye icyemezo yari amaze gufata, undi ati : “Ni uyu mwirabura.” Yakoresheje ijambo ‘Negro’.

Ovidiu Haltegan yaje kwereka Webo ikarita itukura, rya jambo Coltescu yavuze riteza impagarara, abakinnyi ba Besaksehir bayobowe n’umunya-Senegal Demba Ba, bahisemo kuva mu kibuga ku munota wa 23 w’umukino, n’aba Paris Saint Germain banga gusigara mu kibuga, bakurikira Baksehir mu rwambariro mu buryo bwo kwifatanya mu kababaro.

Ishyirahamwe ry’umupira w’amaguru ku mugabane w’Uburayi (UEFA) ryahise ritangaza ko ribaye risubitse uyu mukino, biza kwemezwa ko usubukurwa saa tanu, ariko Baksehir yavuze ko ikina ari uko Coltecsu abanje kuvanwa mu kibuga, na Paris Saint Germain irayishyigikira.

Umukino bikekwa ko usubukurwa kuri uyu wa 9 Ukuboza 2020, UEFA kandi ikaba yizeje ko ikora iperereza ku mvugo y’ivangura Coltescu yashinjwe.