Perezida Vladimir Putin w’u Burusiya, yatangaje ko nta mpamvu abona yatuma ahura imbonankubone na mugenzi we Volodymyr Zelensky wa Ukraine waherukaga kumwandikira ibaruwa ifunguye amusaba ko bahura bakaganira ku ihagarikwa ry’intambara imaze imyaka irenga ine.
Putin mu ijambo yavugiye i Moscow ku wa 5 Kamena 2026, yagaragaje ko ibiganiro hagati y’abakuru b’ibihugu bidakwiye kuba intangiriro y’imishyikirano, ahubwo ko bikwiye kuba umwanzuro w’ibiganiro byabanje gukorwa n’inzobere ku mpande zombi.
Yagize ati: “Nta mpamvu mbona yo guhura na we muri iki gihe. Inama y’abakuru b’ibihugu ikwiye kuba iyo gushyira umukono ku byo impande zombi zamaze kumvikanaho, si ugutangira ibiganiro.”
Putin yabivuze ibi nyuma y’amasaha make Zelensky amwandikiye ibaruwa ifunguye amusaba kwemera ibiganiro by’imbonankubone, mu rwego rwo gushaka umuti wa dipolomasi warangiza intambara hagati y’ibihugu byabo.
Muri iyo baruwa, Zelensky yasabye ko habaho agahenge k’igihe runaka, hakabaho guhererekanya imfungwa z’intambara ndetse n’uko habaho inama y’abakuru b’ibihugu byombi ishobora kubera mu gihugu kidafite aho kibogamiye nka Türkiye cyangwa u Busuwisi.
Perezida wa Ukraine yari yavuze ko guhura kwabo imbonankubone byatanga amahirwe yo kugera ku masezerano y’amahoro no kugabanya ububabare abaturage b’impande zombi bakomeje guterwa n’intambara.
Icyakora, Putin yavuze ko atemera ko ibiganiro nk’ibyo byatanga umusaruro mu gihe impande zombi zitaranoza ingingo z’ibanze zaganirwaho.
Yanavuze ko ibitero Ukraine ikomeje kugaba ku butaka bw’u Burusiya bituma bigorana kurushaho kubaka icyizere gikenewe kugira ngo haboneke umuti wa dipolomasi.
Nyuma y’ayo magambo ya Putin, Zelensky yanenze icyo cyemezo, avuga ko kigaragaza ko Kremlin ititeguye kurangiza intambara muri iki gihe.
Intambara y’u Burusiya na Ukraine yatangiye muri Gashyantare 2022 ikomeje kuba imwe mu zikomeye zabaye ku mugabane w’u Burayi nyuma y’Intambara y’Ubutita, ndetse kugeza ubu impande zombi ziracyakomeje kurwana mu gihe ibiganiro by’amahoro bitaragera ku musaruro ufatika.
