Rais wa Tanzania, Samia Suluhu Hassan, ametoa onyo kali kwa raia wa Kenya, akiwataka waache kuingilia masuala ya ndani ya nchi yake au kujaribu kuichafua.
Onyo hili limetolewa saa chache tu baada ya Tanzania kuwafukuza raia sita wa Kenya waliokuwa wanahusika na siasa.
Miongoni mwa waliofukuzwa ni Martha Karua, kiongozi wa chama cha upinzani People’s Liberation Party (PLP) nchini Kenya, pamoja na wenzake Willy Mutunga, Hussein Khalid na Hanifa Adan. Walikuwa wamewasili Tanzania kufuatilia kesi ya Tundu Lissu, kiongozi wa chama cha upinzani CHADEMA nchini humo.
Tundu Lissu amekuwa rumande kwa muda sasa na anakabiliwa na mashtaka mazito, yakiwemo ya uhaini.
Kabla ya kuondolewa nchini, Martha Karua alishikiliwa kwa muda katika Uwanja wa Ndege wa Kimataifa wa Julius Nyerere uliopo Dar es Salaam.
Karua alisikika hivi karibuni akilalamikia Tanzania, akisema kuwa “kuna nchi mwanachama wa Jumuiya ya Afrika Mashariki (EAC) inayoziba sauti ya upinzani katika kanda hii.”
Baada ya kufukuzwa kwa Karua na wenzake, Rais Samia alitoa kauli kali akisema Tanzania haitavumilia yeyote atakayejaribu kuharibu usalama wa taifa.
Akasema:
“Tunaanza kuona wanaharakati wanaojaribu kuingilia mambo yetu ya ndani. Ikiwa wamepigwa marufuku katika nchi zao, hawapaswi kuja kuleta vurugu hapa. Tanzania ni miongoni mwa nchi chache zilizo salama na tulivu, hatutaruhusu mtu yeyote kutoka nje kuja kuleta fujo hapa.”
Rais Samia pia aliagiza mamlaka kuhakikisha kuwa watu waliokiuka sheria katika nchi zao hawapewi nafasi ya kuingia Tanzania.
