Ubugenzuzi Bukuru bw’Imari ya Leta ya Congo bukurikiranye ba Guverineri babiri; Atou Matubuana, Guverineri wa Kongo-Central na Wale Lufungula w’Intara ya Tshopo. Uwa mbere akurikiranweho kunyereza akayabo ka miliyoni 5 z’Amadolari, mu gihe uwa kabiri akurikiranweho kugerageza kunyereza umutungo afatanyije n’uwahoze ari minisitiri.
Umugenzuzi Mukuru w’imari ya Leta ashinja Atou Matubuana miliyoni 5 z’Amadolari angana na miliyari 10 z’Amafaranga ya Congo.
Aya mafaranga yari agenewe serivisi za gisivili n’iza gisirikare mu bijyanye n’ubutabera n’umutekano. Hari kandi abashinjwa gufatanya nawe mu kunyereza ayo mafaranga.
Uwahoze ari Minisitiri w’uburenganzira bwa muntu aratungwa urutoki
Guverineri Walle Lufungula, we yashinjwe mu rukiko rusesa imanza kugerageza kunyereza amafaranga abarirwa mu madolari 21,000 yari impozamarira y’abantu bagizweho ingaruka n’Intambara ya Kisangani muri za 2000.
Uwahoze ari Minisitiri w’uburenganzira bwa muntu André Lite avugwa muri iyi dosiye, ariko avuga ko ntacyo umutimanama we umushinja kandi yiteguye guhura n’Ubugenzuzi Mukuru w’Imari ya Leta. We avuga ko amafaranga yabikujwe yakoreshejwe icyo yari agenewe.
