Abakozi batatu ba Caritas Congo bari bashimutiwe kuri uyu wa kabiri ushize mu burasirazuba bwa Congo n’abarwanyi bakekwaho kuba mu mutwe wa FDLR, barekuwe.
Nk’uko byatangajwe n’ushinzwe itumanaho muri Caritas Congo, Guy-Marin Kamandji, ngo abakozi batatu babo bashimutiwe hafi ya Goma barekuwe kuri uyu wa Gatatu, ariko ntiyagira byinshi atangaza ku kuntu aba barekuwe.
Kuwa Kabiri, Kamandji akaba yari yatangaje ko bakeka ko iri shimuta ryakozwe n’umutwe wa FDLR urwanya ubutegetsi bw’u Rwanda uri mu mashyamba ya Congo.
Yagize ati: “Imodoka 2 za Caritas Congo ASBL zaterewe I Misinga (Mu birometero 125 mu majyaruguru y’uburengerazuba bwa Goma) maze abakozi batatu b’abakongomani barashimutwa ”.
Yakomeje avuga ko indi modoka yafashwe n’inkongi ariko ikabasha gusubira inyuma aho yari iturutse n’abari bayirimo bose barimo umunyamakuru w’amafoto w’Umudage wakomeretse ku kaguru. Izi modoka ngo zikaba nta mafaranga cyangwa ubundi bufasha zari zitwaye nk’uko Radio Okapi dukesha iyi nkuru ikomeza ivuga.
[xyz-ihs snippet=”google-pub”]
Umutwe wa FDLR, ukorera muri Kivu zombi, ukunze gushinjwa ibyaha bitandukanye ukorera abaturage mu bice ugenzura, ariko guverinoma ya Congo yo ntitinya kwemeza ko uyu mutwe wacitse intege abantu usigaranye ngo bakaba batateza ibibazo.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
