RDC: Ambasaderi wa EU yamaganye abavuga ko uw’u Butaliyani yishwe agiye mu birombe

Ambasaderi w’u Butaliyani, Luca Attanasio yicanywe n’umurinzi we, Vittorio Lacovacci n’umushoferi w’ishami ry’Umuryango w’Abibumbye rishinzwe ibiribwa (PAM), Mustapha Milambo tariki ya 22 Gashyantare 2021, ubwo bari bageze muri Gurupoma ya Kibumba muri Teritwari ya Nyiragongo.

Nyuma y’itangazwa ry’urupfu rwabo, ku mbuga nkoranyambaga hatangiye gusakara ifoto igaragaza uvugwa ko ari Ambasaderi Attanasio yerekeza mu kirombe gicukurirwamo amabuye y’agaciro, bitangira guhwihwiswa ko yari asanzwe ajya mu bucukuzi bw’aya mabuye muri Kivu y’Amajyaruguru; igice kizwimo umutekano muke uterwa n’imitwe yitwaje intwaro.

Iyi foto ya mbere yasakaye ku mbuga nkoranyambaga, bivugwa ko uwa kabiri ari Ambasaderi Attanasio, yerekeza mu kirombe

Ambasaderi Chântaigner yifashishije urubuga rwa LinkedIn yatangaje ko Ambasaderi Attanasio atigeze ajya mu bucukuzi bw’amabuye y’agaciro, mu buryo bwo kwerekana ko iyi foto yahimbwe mu buryo bw’ikoranabuhanga, yongeraho ko ababikoze bashaka kuhindanya isura ye.

Ati: “Ibyatangajwe kuri Facebook na Twitter bigamije guhindanya isura y’inshuti yanjye Ambasaderi Luca Attanasio, wicanwe n’umushoferi n’umurinzi we, bisobanura ko impamvu y’uruzinduko rwe muri Kivu y’Amajyaruguru ari ugushaka inyungu mu bucukuzi bw’amabuye y’agaciro. Amakuru y’Ibihuha.”

Yakomeje ati: “Ndakomeza kubibutsa ko u Butaliyani nta kigo gikora ubucukuzi bw’amabuye y’agaciro bufite muri RDC ndetse bwifatanyije na EU mu kurwanya ubucuruzi bw’amabuye y’agaciro butemewe mu bice birimo umutekano muke.”

Ambasaderi Chantaigner yasobanuye ko impamvu z’uruzinduko rwa Ambasaderi Attanasio muri Kivu y’Amajyaruguru ari ebyiri: imwe ikaba yari ugukorana inama n’Abataliyani baba mu mujyi wa Goma, indi ikaba gusura imishinga ya PAM irebana no gutanga ibiribwa na za kantine (cantines) mu bigo by’amashuri. Ati: “Ni ibisanzwe kuri Ambasaderi ko yasura imishinga ya PAM. Nanjye nabikoze kenshi.”

Uruzinduko rwa Ambasaderi Attanasio rwatangiye kuba urujijo kuri bamwe, ubwo humvikanaga amakuru y’uko yagiye adafite uburinzi bwihariye nk’umudipolomate, Aristide Mululunganya wirukanwe ku mwanya w’Umuyobozi w’Ibiro bya Minisitiri ushinzwe umutekano w’imbere, tariki ya 22 Gashyantare 2021 we akaba yarasobanuye ko inzego zishinzwe umutekano n’ubuyobozi muri Kivu y’Amajyaruguru batigeze bamenya iby’uru rugendo rwe, mu gace karimo umutekano muke kugira ngo babe bamuha abamuherekeza.

Kurikira ibiganiro n’amavidewo binyura kuri Bwiza TV