Igisirikare cya Congo Kinshasa (FARDC), cyatangaje ko umutwe wa CODECO wiyemeje kureka ibikorwa by’ubwicanyi ugashyira intwaro hasi nyuma y’ibiganiro bya politiki na leta.
Coopérative pour le développement du Congo (CODECO) ni umwe mu mitwe ivugwaho ubwicanyi bukomeye mu ntara ya Ituri.
Uyu mutwe wiyemeje gushyira intwaro hasi ejo ku wa Mbere, nyuma y’ibiganiro bihuza amoko muri Ituri byitabiriwe n’abakuru b’ubwoko bw’aba-Lendu abenshi mu barwanyi ba CODECO baturikamo na Leta ya Kinshasa.
Raporo ya FARDC yasubiyemo amagambo ya Célestin Tawara wari uhagarariye buriya bwoko avuga ko “CODECO igiye mu nzira y’amahoro, twizeye ko kuva none amahoro agarutse mu ntara yacu.”
Abari bahagarariye ubwoko bw’aba-Lendu bavuze ko bumvikanye na leta ku gufasha aabarwanyi ba CODECO gusubira mu buzima busanzwe, ibiri mu by’ibanze abarwanyi b’imitwe yitwaje intwaro y’abanye-Congo basaba leta mbere yo gushyira intwaro hasi.
CODECO yari imaze igihe ishinjwa gukorera ubwicanyi bukomeye muri Teritwari ya Djugu ho mu ntara ya Ituri, burimo n’ubwabaye mu kwezi gushize aho abaturage bagera kuri 50 biciwe mu gace k’ubucukuzi bw’amabuye y’agaciro.
Uyu mutwe n’indi ikorera muri Congo Kinshasa ikomeje gushyira intwaro hasi mu gihe akarere gakomeje gutegura ingabo zo kujya kurandura imitwe yitwaje intwaro imaze igihe yarayogoje Congo.
