Mu mpera z’icyumweru gishize umutwe wa FDLR wagabweho ibitero n’ingabo za FARDC mu gace ka Rutshuru bucya uyu mutwe nawo ujya kwihimura ku kubabagabyeho ibitero 7bahasiga agatwe
Amakuru aturuka mu ngabo za FARDC avuga impamvu yo kugaba ibitero kuri FDLR ari mu rwego rwo kurangiza burundu ikibazo cy’umutekano muke uterwa na FDLR muri aka gace hamwe n’indi mitwe yitwara gisirikare.
Ibitero byagabwe kuri FDLR byagabwe mu duce twa Chondo ku nkengero z’ikiyaga cya Edouard muri Kigaligali. Aha ni ni mu ishyamba rya Virunga na Katwiguru, Busesa, Kiseguru, Kishari na Nyabanira.
Amakuru aturuka muri Societe Civile muri Rutshuru avuga ko FDLR igabweho ibi bitero nyuma y’icyumweru kimwe yirukanywe Lubero iza aha Rutshuru aho yari yarabujije abaturage kujya guhinga. Ngo abaturage bamwe na bamwe bari barahungiye muri Uganda mu gace gahana imbibi n’aka.
Capitaine Njike Kaiko umuvugizi wa Operation yiswe Sokora II igamije kwirukana no kwambura intwaro imitwe yose yitwara gisirikare avuga ko FDLR na Mai Mai ubu iyi mitwe yombi yaraye yirukanywe muri Chondo.
Bucyeye bwaho iyi mitwe yombi ifatanyije yaramutse yihimura kuri FARDC hamwe n’abarinzi ba Parike muri Chondo na Kawu barindwi ku ruhande rwa FARDC n’abarinzi ba Parike bahasiga agatwe.
Ibi bitero bikaba byaragabwe ku birindiro 3 bya FARDC biherereye i Rutshuru na Lubero ku nkengero z’ikiyaga cya Edouard muri Pariki ya Virunga.
Ibi bitero bikaba byaragabweho kuwa gatandatu hagati ya saa kumi na saa kumi n’imwe nk’uko byatangajwe na Joel Wengmulayi ushinzwe itumanaho muri ICCN wanavuze ko FDLR yahitanye abarinzi ba Parike 2.
Ikindi gitero cyagabwe mu ijoro ryo ku cyumweru mu duce twa Chanika mu majyepfo ya Kamandi.
Amakuru aturuka mu ngabo za FARDC avuga ko abarwanyi babiri ku ruhande rwa FARDC bahasize agatwe naho 5 ku ruhande rw’inyeshyamba nabo bitaba Imana.
Aya makuru akomeza avuga ko abarinzi ba Pariki babiri bari bafashwe mpiri na FDLR babohojwe nyuma y’aho habonekeye izindi ngabo zo gutera ingabo mu bitugu abarwanyi ba FARDC bari bugarijwe n’izi nyeshyamba.
Ibiro ntaramakuru by’abafaransa AFP bivuga ko aba barwanyi bagaba ibitero bari bagamije gushinga ibirindiro muri aka gace kugira ngo babone uburyo bajya baroba mu kiyaga cya Edouard.
Aya makuru akaba yaremejwe na Capitaine Guillaume Djike umuvugizi w’ingabo muri aka gace.
Andi makuru aturuka muri aka gace avuga ko nyuma y’ibi bitero uko ari bitatu abarinzi ba Pariki bari bahunze aka gace bagarutse mu kazi kabo i Vitchumbi.
Andi makuru nayo yemeza ko nyuma y’ibi bitero uko ari bitatu Mai Mai yabyungukiyemo isigara ariyo icunga agace ka Chanika naho FDLR ibihomberamo yirukanwa mu gace.
Kanda hano ujye ubona amakuru yihuse kandi kugihe kuri Facebook no kuri twitter
Alphonse Munyankindi / Bwiza.com
