Guverinoma ya Repubulika ya Demukarasi ya Congo (RDC) yirukanye umuyobozi w’ibiro bya Minisitiri w’Intebe wungirije/Minisitiri ushinzwe umutekano w’imbere mu gihugu, Bulakali Mululunganya Aristide azira gusinya no gusohora itangazo rishinja umutwe witwaje intwaro wa FDLR kwica Ambasaderi w’u Butaliyani n’abandi babiri.
Bigaragara mu itangazo rya Minisitiri wungirije ushinzwe umutekano w’imbere, Innocent Bokele Walaka, yasinye ku wa Kabiri tariki ya 23 Gashyantare 2021 mu izina rya Minisitiri w’Intebe wungirije akaba na Minisitri w’Umutekano w’Imbere.
Visi Minisitiri Bokele yagize ati: “Umuyobozi w’Ibiro bya Minisitiri yirukanwe ku mirimo ye kuri uyu wa Kabiri tariki ya 23 Gashyantare 2021 kubera ko yasinye akanatangaza atabiherewe uburenganzira, nta buzirenenge, itangazo ryo ku wa Mbere tariki ya 22 Gashyantare 2021 yageneye itangazamakuru ryo mu gihugu na mpuzamahanga mu izina rya Minisitiri w’Intebe wungirije/Minisitiri ushinzwe umutekano w’imbere ry’urupfu rwa Ambasaderi wa Repubulika y’u Butaliyani mu Ntara ya Kivu y’Amajyaruguru.”
Tariki ya 22 Gashyantare 2021 ni bwo Mululunganya yasohoye itangazo rigenewe itangazamakuru, atanga amakuru arambuye ku rupfu rwa Ambasaderi w’u Butaliyani, Luca Attanasio, umurinzi we, Vittorio Iacovacci ndetse n’umushoferi w’ishami ry’Umuryango w’Abibumbye rishinzwe ibiribwa (PAM), Mustapha Milambo, barasiwe n’abitwaje intwaro mu muhanda uva mu mujyi wa Goma ugana muri Teritwari ya Rutshuru, hafi ya Pariki ya Virunga.
Muri iri tangazo, Mululunganya yagize ati: “Ku wa Mbere 22 Gashyantare 2021 ahagana saa tatu mu gitondo, imodoka ya PAM yagabweho igitero n’abagize FDLR ku muhanda wa Rutshuru, Gurupoma ya Kibumba muri Teritwari ya Nyiragongo. […] Ambasaderi Luca Attanasio warashwe mu nda yatabawe n’abarinzi ba ICCN, bamujyanye i Goma mu bitaro bya MONUSCO muri RD-Congo, aho yaje gupfira kubera ibikomere.”
Yakomeje asobanura ko inzego zishinzwe umutekano ndetse n’ubuyobozi bwo mu Ntara ya Kivu y’Amajyaruguru butabashije guha Ambasaderi Attanasio uburinzi bwihariye, cyane ko butamenye ko ari muri aka gace katizeweho umutekano.
Ati: “Inzego zishinzwe umutekano n’ubuyobozi bw’Intara ntibashoboye gufata ingamba zihariye z’umutekano kuri iyo modoka [barimo], cyangwa ngo zibafashe kubera ko batari bazi ko bari muri aka gace kabamo umutekano muke.”
Mululunganya yirukanwe hashingiwe ku ngingo ya 31 y’iteka No20/016 rya RDC ryo ku wa 27 Werurwe 2020 rigenga imikorere n’imikoranire hagati ya Perezida wa Repubulika na Guverinoma ndetse n’abayobozi b’ibiro bya za Minisiteri, iteka No20/014 ryo ku wa 2 Mata 2020 rigenga imikorere y’abayobozi b’ibiro bya Minisiteri mu ngingo ya 22 n’iya 25 ndetse n’iteka No017/2002 ryo ku wa 3 Ukwakira 2002 rigenga imyitwarire myiza y’umukozi wa Leta.
Kurikira ibiganiro n’amavidewo binyura kuri Bwiza TV
2 Responses
RDC: Umuyobozi watangaje ko FDLR yishe Ambasaderi w’u Butaliyani, yirukanwe
Uyu ni igicucu ni bamwirukane kuvuga ibintu bitagira gihamya inyungu fdlr ifite yo kwica ambassadeur ya italie niiyihe cgwa akorera leta y’urwanda kuko bizwi neza ko ariyo iri inyuma yu rupfu rwu uyu ambassadeur ngo babishyire ku mutwe wa fdlr nkuko bigeze kwica abanyamerika bigashyirwa ku mutwe wa fdlr nyuma cia igatahura ko ari imitwe y’inkotanyi arizo zabishe
RDC: Umuyobozi watangaje ko FDLR yishe Ambasaderi w’u Butaliyani, yirukanwe
Uyu ni igicucu ni bamwirukane kuvuga ibintu bitagira gihamya inyungu fdlr ifite yo kwica ambassadeur ya italie niiyihe cgwa akorera leta y’urwanda kuko bizwi neza ko ariyo iri inyuma yu rupfu rwu uyu ambassadeur ngo babishyire ku mutwe wa fdlr nkuko bigeze kwica abanyamerika bigashyirwa ku mutwe wa fdlr nyuma cia igatahura ko ari imitwe y’inkotanyi arizo zabishe