Kuri uyu wa Kabiri, itariki 12 Kanama, Minisiteri y’imari ya Leta Zunze Ubumwe za Amerika yatangaje ibihano ku nzego zifitanye isano n’ubugizi bwa nabi bw’imitwe yitwaje intwaro n’ubucuruzi butemewe bw’amabuye y’agaciro muri Repubulika ya Demokarasi ya Congo.
Ibiro bishinzwe kugenzura umutungo w’amahanga (OFAC) byibasiye umutwe wa Coalition des Patriotes Résistants Congolais-Force de Frappe (PARECO-FF), ukorera mu gace gacukurwamo amabuye y’agaciro ka Rubaya (Kivu y’Amajyaruguru), ndetse na Koperative y’Abacukura amabuye mu buryo Gakondo ya Congo (CDMC) hamwe n’amasosiyete abiri akorera muri Hong Kong, East Rise Corporation Limited na Star Dragon Corporation Limited.
Nk’uko Leta Zunze Ubumwe za Amerika zibitangaza, M23 yamaze gufatirwa ibihano na Amerika na Loni, yaguye aho igenzura mu burasirazuba bwa DRC, bigira uruhare mu guhungabanya umutekano no guhonyora uburenganzira bwa muntu.
Umutwe wa PARECO-FF wagaragaye mu 2022, urashinjwa kugenzura ibikorwa byo gucukura amabuye y’agaciro mu buryo butemewe, gusoresha, no gukoresha imirimo y’agahato.
CDMC yo ngo yagurishije amabuye y’agaciro yavuye mu turere tugenzurwa na PARECO-FF kuri East Rise na Star Dragon, aho bivugwa ko akunze kunyura mu Rwanda yerekeza ku masoko mpuzamahanga, cyane cyane u Bushinwa.
Ibi bihano byafashwe birimo gufatira umutungo wose w’ibigo byavuzwe muri Amerika ni kubuza Abanyamerika gukorana nabo ubucuruzi. Izo ngamba ngo zigamije “guteza impinduka nziza mu myitwarire” kandi ko biri mu muhate wa Amerika wo kugarura ituze mu burasirazuba bwa DRC no kurinda uruhererekane rwemewe rw’amabuye y’agaciro y’ingenzi.
