U Rwanda rugiye kubona indege 2 nshya zo mu bwoko bwa Cessna Grand Caravan zizajya zikoreshwa mu bikorwa by’ubutabazi (zitwara abarwayi) ndetse zinikorera imizigo itaremereye mu bikorwa by’ubutumwa bw’Umuryango w’Abibumbye byo kubungabunga amahoro muri Afurika nk’uko byahishuwe kuwa 20 Nzeri.
Amakuru yaturutse mu gisirikare cya Leta Zunze Ubumwe za Amerika cyo mu kirere (USAF) izi ndege zifite moteri imwe zizajya zikoreshwa mu gutwara imiti, abarwayi cyangwa inkomere ndetse n’imizigo itaremereye.
Biteganyijwe ko izi ndege zizatangwa zisize irangi zifite n’ibirango by’igisirikare cy’U Rwanda cyo mu kirere (RAF), zikazifashishwa mu bikorwa byo kubungabunga amahoro bya Loni mu bihugu bya Centrafrica, Sudani, Sudani y’Epfo cyangwa ahandi muri Afurika nk’uko iyi nkuru dukesha urubuga janes.com ruzobereye kwandika ku nkuru zifitanye isano n’igisirikare, ubwikorezi n’inkuru ku bumenyi bw’ikirere ikomeza ivuga.
Izi ndege biteganyijwe ko zizatangwa muri gahunda y’ubucuruzi bwa gisirikare mu mahanga ya Leta Zunze Ubumwe za Amerika (FMS), zizaba ari indege zitarengeje uburemere bw’ibiro 5,600, ni nshya kandi zifite amababa ari hejuru ku buryo umupilote abasha kureba ku butaka neza.
