Umuvigizi wa gisirikare w’inyeshyamba za RED-Tabara zirwanya ubutegetsi bw’u Burundi, Patrick Nahimana, yemeje ko abarwanyi baherutse gufatwa n’ingabo z’u Rwanda ari ababo.
Kuri uyu wa Mbere nibwo Igisirikare cy’u Rwanda (RDF) kerekanye abarwanyi cyavuze ko ari abo mu mutwe wa RED-Tabara bafatiwe mu Rwanda bahayobeye.
Mu kiganiro yagiranye na BBC yagize ati:”Abo nibyo ni akarwi k’abahungu bacu bacyeya, bariho bagenda mu ishamba kimeza rya Kibira barazimira bisanga muri Nyungwe mu Rwanda”.
Igisikare cy’u Rwanda kivuga ko cyabimenyesheje itsinda rya EJVM ry’Inama Mpuzamahanga ku Karere k’Ibiyaga Bigari (ICGLR), ari nabo beretswe abo barwanyi uyu munsi ngo bakore iperereza ryabo.
Itangazo ry’igisirikare cy’u Rwanda ryo kuwa Gatandatu, rivuga ko abarwanyi 19 bafatiwe ku itariki 29 Nzeri mu ishyamba rya Nyungwe mu Murenge wa Ruheru mu Karere ka Nyaruguru, ari naho ryavuze ko bafungiwe.
