Urubanza ruburanishwa mu mizi rwa Paul Rusesabagina n’abandi 20 bakurikiranweho ibyaha by’iterabwoba rwatangiye mu masaa mbiri y’uyu wa 17 Gashyantare 2021, rurakomeje.
Perezida w’Iburanisha yasomye imyirondoro y’abaregwa , ubwo yageraga kuri Rusesabagina, yamubajije ati: “Umwirondoro wasomwe ni uwawe?”
Uyu musaza w’imyaka 66 y’amavuko, yasubije ati: “Murakoze cyane nyakubahwa Perezida. Ndagira ngo mbabwire yuko umwirondoro atari wo uko wagombaga kuba umeze.”
Rusesabagina yakomeje ahanakana kuba ari Umunyarwanda nk’uko Perezida w’Iburanisha yari amaze kubitangaza. Ati: “Ntabwo njyewe ndi Umunyarwanda, ndagira ngo nongere mbisobanure ku nshuro ya gatanu kuko nabivuze mu nzego zose.”
Perezida w’Iburanisha yamusubije ati: “Oya inshuro tureba ni iya hano. Dusobanurire kuri iyi nshuro twebwe ni bwo tukibyumva.”
Rusesabagina yakomeje ati: “Umwirondoro wanjye si wo kuko ntabwo ndi Umunyarwanda.” Abajijwe umwirondoro we nyakuri, yasabye ko Umwanditsi w’Urukiko yandika ko ari “Umubiligi”, Perezida w’Iburanisha arabimwemerera.
Rusesabagina yatawe muri yombi n’Urwego rw’Igihugu rw’Ubuganzacyaha (RIB) muri Kanama 2020, ubwo yari avuye i Dubai. Akurikiranweho ibyaha icyenda.
Kurikira amakuru n’ibiganiro kuri Bwiza TV, ukanze hano
