Ku munsi wa 2 w’ukwezi kwahariwe ibikorwa bya polisi y’igihugu,mu murenge wa Kamembe mu karere ka Rusizi,polisi y’igihugu ku bufatanye n’ubuyobozi bw’akarere ka Rusizi imbere y’imbaga y’abaturage,kuri uyu wa 16 Nyakanga hangijwe ibilo 60 by’urumogi bifite agaciro ka 4.500.000 z’amanyarwanda, mu rwego rwo gukangurira abaturage ububi bw’ibiyobyabwenge no kubashishikariza kubyirinda, cyane cyane ko aka gace byangirijwemo kegereye ako ubuyobozi bw’aka karere buvuga ko gasa n’akabaye indiri y’abanywarumogi kitwa Rushakamba,banerekwa ibihano bikaze bihabwa abarucuruza n’abandi barufatanwa.
Nk’uko itangazamakuru ryabitangarijwe n’umuyobozi w’aka karere Kayumba Ephrem,ngo kuba aka karere cyane cyane mu mirenge y’umujyi wa Rusizi hakunze kugaragara ibiyobyabwenge byinshi cyane cyane urumogi ari ukubera ko kimwe mu bihugu bihana imbibe na ko usanga bamwe mu baturage bacyo baruhinga bakanagirana imikoranire n’abatuye utu duce duhana imipaka na cyo, bigatuma ruhafatirwa cyane,hakaba hashobora no kuba hari urundi rudafatwa nubwo ngo atari rwinshi cyane kubera ingamba zashyizweho zo guhashya abarunywa n’abarucuruza.
Avuga ko uretse urumogi ibindi biyobyabwenge bikunze kugaragara muri aka karere ari inzoga zikorwa mu buryo butujuje ubuziranenge, izo nzoga hamwe n’urwo rumogi bikaba bigomba kurwanywa na buri wese kubera ingorane biteza mu baturage.
Ati “Uyu munsi wa 2 w’ukwezi kwahariwe ibikorwa bya polisi y’igihugu twawuhariye kwereka abaturage ububwi bw’ibiyobyabwenge ku buzima bwabo,twangiza n’uru rumogi twagiye dufatira hirya no hino mu bihe bitandukanye,mu minsi ishize hakaba harangijwe urundi rufite agaciro k’amafaranga hafi 70.000.000, tugasaba abarucuruza n’abarukwirakwiza mu baturage bacu kubireka,cyane cyane ko ibihano byabo bikarishye,buri wese ubonye ugerageza kunywa ibiyobyabwenge wese akamugira inama yo kubireka kuko aho kugirira akamaro ubuzima bibwangiza cyane.’’
Avuga kandi ko hari abagiye bahanirwa uku gukoresha ibiyobyabwenge mu buryo butandukanye, kandi ko kubyangiza bidakorwa mu kwezi kwahariwe ibikorwa bya polisi y’igihugu gusa, ko bizakomeza kwangizwa uko bifashwe, akaboneraho kubwira cyane cyane urubyiruko rubyiyahuza kubireka,rugashaka ibikorwa bizima rukora ntirwishore mu bishobora kurwangiriza ubuzima gutyo.
Umuyobozi wa polisi muri aka karere, SP Ruganintwari Athanase na we yasabye abatuye aka gace k’umujyi wa Rusizi kujya batangira amakuru ku gihe aho bakeka ibi biyobyabwenge kuko bibangiriza abana bakabaye bagira icyo bimarira bakanakibamarira,ahubwo ugasanga babatinyuka kubera uburyo bibahindura ibikange bakumva ntacyo bagitinya, anabasaba kuzakomeza ubufatanye na polisi muri uku kwezi no mu bindi bikorwa izakora kuko byose ari ibibafitiye akamaro,kandi ubufatanye busesuye na bo ntibuzagabanuke na nyuma y’uku kwezi.
Umwe mu babyeyi batuye aka kagari ka Gihundwe muri uyu murenge wa Kamembe yabwiye Bwiza.com ko, ibiyobyabwenge bifatwa na zimwe mu nsoresore zirirwa muri uyu mujyi ntacyo zikora bibagiraho ingaruka bose kuko zirara zibabuza umutekano kubera urusaku rwazo no kurwana kwa hato na hato, baboneraho gusaba ubuyobozi bw’aka karere kongera ingufu mu kugenzura utubari twinshi usangamo urubyiruko rwasinze cyane mu masaha y’akazi.
Ati’’ abo birirwa mu tubari banywa ni bo bahindukira bakatwiba nijoro bamwe badutoboreye amazu cyangwa bakarara mu rugomo bahuye n’ababa biroshyemo ibyo bimogi,tugasaba inzego z’umutekano guhashya aba basore n’inkumi birirwa mu biyoga aho gukora n’ababicuruza bagahanwa by’intangarugero, tuzaba dutabawe rwose kuko baraturembeje.’’
Umushinjacyaha ku rwego rwisumbuye rwa Rusizi, Barajiginywa Diogène avuga ko hari ibihano bikarishye ku bakora,abahinga,ababika,abaha abandi n’abagurisha mu gihugu ibyobyabwenge,agasaba abaturage guca ukubiri n’izi ngeso kuko zishobora kubata mu kaga gakomeye, bigatuma batabona umwanya wo gukora ibibateza imbere,kuko muri ibi bihano harimo no gufungwa igihe kitari gito.
