Rutahizamu w’Ikipe y’Igihugu ‘Amavubi’, Iradukunda Jean Bertrand, yamaze gutandukana n’ikipe ya Township Rollers yo muri Botswana yari amaze amezi arindwi akinira.
Mu UKwakira 2021 ni bwo Bertrand yari yerekeje muri iyi kipe avuye muri Gasogi United, ayisinyira imyaka ibiri gusa mu kwezi kwakurikiyeho agira imvune yo mu ivi yatumye amara igihe kirekire adakina.
Uyu mukinnyi yahisemo gutandukana n’iriya kipe yari amazemo amezi arindwi, nyuma yo gusesa amasezerano ku bwumvikane.
Bivugwa ko uyu mukinnyi ari we wafashe iya mbere mu gusaba iriya kipe ko batandukana, bijyanye no kuba yari atishimiye ubuzima abayemo.
Biteganyijwe ko Betrand kuri uyu wa Gatandatu ari bwo ahaguruka muri Botswana agaruka mu Rwanda, nyuma yo guhabwa release letter imwemerera kwerekeza aho ashaka.
Iradukunda Jean Bertrand yatandukanye na APR FC muri 2016 yerekeza muri Bugesera FC yakiniye umwaka umwe ahita yerekeza muri Police FC nayo ayikinira umwaka umwe, muri 2018 yerekeje muri Mukura VS ayikinira imyaka 2 maze muri 2020 yayivuyemo yerekeza muri Gasogi United.
