Abanyamuryango ba (COTRAVERWA) Koperative y’abatwara abagenzi ku magare, bakorera mu mujyi wa Rwamagana, bavuga ko barambiwe abayobozi ba Koperative banyereza umutungo wayo, aba banyonzi bakaba basaba ko bashyirirwaho ubuyobozi bushya kugirango umutungo wabo udakomeza kunyerezwa.
Umunyamuryango winjiye muri COTRAVERWA, yishyura ibihumbi 28 Frw nk’umugabane shingiro, umunyamuryango wese kandi atanga umusanzu w’amafaranga 300 Frw buri cyumweru, umunyamuryango ukoze ikosa ahanishwa hagati y’amafaranga 1000 n’ibihumbi 5000.
Iyo koperative ifite imitungo irimo inzu ifite imiryango ikodeshwa iherereye mu kagari ka Sibagire mu Murenge wa Kigabiro n’ishyamba riherereye mu Murenge wa Rubona.
Nubwo Iyi koperative yinjiza amafaranga aturuka mu banyamuryango bayo ndetse n’imitungo yayo bavuga ko iyi mitungo aho kubageza ku iterambere, imitungo yabo yakomeje kujya inyerezwa n’abasimburanye mu buyobozi.
Abanyamuryango bavuga ko uburyo bwifashishwa n’abayobozi mu kunyereza umutungo wabo, hari ababinyuza mu mugabane shingiro baka mu ntoki, mu gihe ubusanzwe bafite konti inyuzwaho amafaranga.
Abanyamuryango kandi bavuga ko abayobozi batoye muri manda zitandukanye banyereza umutungo wabo babinyujije mu buryo bwo kwiguriza amafaranga, bakayavana kuri konti bikavugwa ko ubu amafaranga yanyerejwe muri ubwo buryo arenga miliyoni 11 Frw.
Abanyonzi bavuga ko barambiwe abayobozi banyereza umutungo wa Koperative yabo.
Umwe mu baganiriye na BWIZA avuga ko ubuyobozi bwavuyeho ndetse n’uburiho uyu munsi bwose bwaranzwe no kunyereza umutungo wabo kuburyo hatagize ibikorwa, na make asigaye nayo yanyerezwa .
Dusabimana Sylvain, ni umwe mu banyamuryango batabaza ubuyobozi kugira hashyirweho ubuyobozi butandukanye n’ubwabayoboye mu bihe bishize.
Yagize ati: “Imitungo ya koperative barayiriye, ariko icyo dushaka ni uko dutora umuyobozi wagira icyo amarira koperative n’abanyamuryango tugatera imbere.”
Habiyambere Hassan, avuga ko biyemeje kutazongera gutanga amafaranga muri koperative kubera kunyereza byakomeje kugaragara muri iyo koperative.
Ati: “Dufite ikibazo muri COTRAVERWA, uwo twari twatoye baramweguje ngo yariye amafaranga. Nyuma yo kweguza perezida,bayariye batuje. Ubu babikuza amafaranga menshi bagakoresha make andi bakirira.”
Habiyambere akomeza asaba Leta kubafasha bagatora umuyobozi bihitiyemo, kuko abo bafite babahombereza imitungo, bakoresha inzibacyuho birira amafaranga.
Hari kandi umwe mu banyonzi wavuze ko yambuwe inyemezabwishyu n’abasekirite bakayica bikaba byarakozwe kuko bafatanyije na perezida kurya amafaranga yabahaye.
Ati :”Abasekirite baramfashe banjyana kwa perezida wa koperative, ambwira ko ngomba kwishyura umugabane shingiro noneho muha amafaranga nawe ampa igipapuro kigaragaza ko nishyuye, hashize iminsi umusekerite yaramfashe mweretse icyo gipapuro aragica ariko ntabwo yari azi ko nagifotoje, bigaragaza ko bafatanya na perezida kurya amafaranga ya koperative.”
Semuzima Emmanuel, Visi perezida wa COTRAVERWA kugeza ubu ariwe muyobozi wa koperative by’agateganyo nyuma y’uko Niyokwizerwa Elie asabwe kwegura ku buyobozi bwayo, avuga ko ibishinjwa abayobozi birimo kunyereza umutungo w’abanyamuryango ntaho bihuriye n’ukuri .
Yagize ati: “Kuba perezida yarasezeye akagenda tukaba twarasigaye mu nshingano, ibikorwa byagombaga gukomeza, naho ibivugwa n’abanyamuryango byo kunyereza umutungo bitandukanye nukuri. Ibyo dukora n’ibintu biteganyijwe.”
Twagerageje kuvugisha umuyobozi w’Akarere ka Rwamagana, Mbonyumuvunyi Radjab ntibyadukundira, kuko inshuro twahamagaye telefoni ye atabashije kuyifata, ndetse n’ubutumwa bugufi twamwandikiye ntiyabashije kubusubiza kugeza ubwo twakoraga iyi nkuru.
Twagerageje kuvugisha kandi Dr. Mugenzi Patrice, Umuyobozi Mukuru w’Ikigo cy’Igihugu gishinzwe guteza imbere amakoperative nawe ntibyadukundira, ndetse ubutumwa twamwandikiye kuri Whatsapp ku wa Kane tariki ya 25 Nyakanga 2024 yarabusomye ariko ntiyasubiza.
COTRAVERWA, yasabye ubuzima gatozi muri Nzeri 2011 ariko abanyamuryango bayo bavuga ko imaze imyaka 15 ishinzwe ikaba igizwe n’abanyamuryango barenga 1300 nubwo bivugwa ko hari abandi bayinjiyemo mu buryo butemewe n’amategeko bikozwe na bamwe mu bayiyoboye.
Muri Werurwe 2024 batumiwe mu nteko rusange ngo bitorere ubuyobozi bushya, kubera inyerezwa ry’umutungo wa koperative barabyanga.
