Kuri uyu wa Kabiri tariki ya 25 Kamena 2024 , abanyamuryango ba FPR-Inkotanyi mu karere ka Rwamagana, bazindukiye mu gikorwa cyo kwamamaza umukandida Paul Kagame ndetse n’abadepite bazahagararira FPR – Inkotanyi mu matora y’abadepite azaba tariki 15 Nyakanga 2024.
Mu rukerera rwo Kuri uyu wa kabiri abanyamuryango ba RPF- Inkotanyi nibwo batangiye kugera ahabereye ibikorwa byo kwamamaza umukandida wa RPF- Inkotanyi mu matora ya Perezida wa Repubulika ndetse n’abakandida bazahagararira umuryango wa FPR – Inkotanyi mu matora y’abadepite .
Mu bikorwa byo kwamamaza abakandida ba FPR-Inkotanyi abantu bafite ubumuga bafashwaga kumva ubutumwa bwatanzwe ,hifashishijwe uwasemuraga ururimi rw’amarenga .
Umuhanzi Danny nanone ni umwe mu bataramiye abitabiriye ibikorwa byo kwamamaza abakandida ba FPR-Inkotanyi,wasabye Abanya -Rwamagana kuzatora umukandida Paul Kagame n’abakandida bayimamariza kuba intumwa za rubanda .
Bamwe mu baturage barimo n’abageze mu zabukuru bari mu babwiye Bwiza.com ko bavuye mu ngo zabo mu masaha ya Saa munani z’ijoro bagera ahabereraga ibikorwa byo kwamamaza abakandida butaracya nyamara bagombaga kuhagera hagati ya Saa kumi n’ebyiri na saa mbiri za mu gitondo.
Abageze mu zabukuru bavuga ko impamvu bazindutse ari urukundo bakunda Perezida Paul Kagame wiyamamariza kuyobora Manda ya Kane nk’umukandida wa FPR -Inkotanyi.
Umwe mu bakandida b’umuryango wa RPF- Inkotanyi, Nabahire Anastase wabuze mu izina rya bagenzi be , yasabye abaturage batuye mu karere ka Rwamagana ko FPR – Inkotanyi kuzatora umukandida Paul Kagame kugira ngo ibyo yagejeje ku banyarwanda byikube kenshi . Umukandida depite Nabahire yakomeje anabasaba kuzatora abakandida ba FPR-Inkotanyi biyamamariza kujya mu Nteko Umutwe w’abadepite .
Ushinzwe ibikorwa byo kwamamaza abakandida ba FPR-Inkotanyi mu karere ka Rwamagana,Umutoni Jeanne yavuze ko muri aka karere abaturage bagejejweho ibikorwa remezo byahinduye imibereho yabo.
Yagize “Turasaba Abanya – Rwamagana kuzatora umukandida Paul Kagame Kugira ngo akomeze atugezeho ibyiza. Mu karere ka Rwamagana,hubatswe imihanda,hubatswe inganda ,ibigo nderabuzima n’amashuri ibyo byose tubikesha umukandida wacu Paul Kagame”.
Ibikorwa byo kwamamaza abakandida bazahagararira FPR -Inkotanyi mu matora ya Perezida wa Repubulika ndetse n’aya abadepite ku rwego rw’Akarere,bizakomereza mu Murenge wa Nzige Tariki ya 11 Nyakanga.
Ibi bikorwa kandi bikomeje kubera mu mirenge yose ndetse no mu tugari bikazageza Tariki ya 13 Nyakanga 2024.
