Ubuyobozi bw’Akarere ka Rwamagana bwemeza ko amabwiriza ajyanye no kubakisha amatafari ya Rukarakara batangiye kuyashyira mu bikorwa bafatanyije n’ihuriro ry’amakoperative y’abafundi bafitanye amasezerano ndetse bakazakomeza gukangurira abafundi bose kubahiriza amabwiriza yashyizweho n’ikigo cy’igihugu gishizwe imiturire .
Mu nkuru twabagejejeho tariki ya 23 Mata, abafundi n’abayede binubiraga kudahabwa akazi bazizwa kubahiriza amabwiriza agenga imyubakire ahubwo kagahabwa abanze kujya mu makoperative bagateza akajagari mu myubakire .
Amabwiriza y’umuyobozi mukuru w’ikigo cy’u Rwanda gishinzwe guteza imiturire ajyanye no kubakisha amatafari ya Rukarakara yishimiwe n’abaturage baburaga ubushobozi bwo kubakisha amatafari ahiye bamwe mu baturage bavuga ko bari baraniniwe no kubaka inzu iciriritse yo guturamo .
Ingingo ya 8 mu mabwiriza ajyanye no kubakisha amatafari ya Rukarakara igaragaragaza ko umuntu wese usaba uruhushya rwo kubaka inzu yo guturamo akoresheje amatafari ya Rukarakara agomba gutanga ibisabwa mu gusaba uruhushya rwo kubaka inzu nshya hakiyongeraho kugaragaza umufundi uzayubakisha wanditse mu ishyirahamwe ry’abafundi .
Iyo ngingo bamwe mu bafundi bavuga ko yashingiweho basabwa kujya mu makoperative y’abafundi afite ubuzima gatozi cyangwa ayafite ibyangombwa by’agateganyo ,ariko kuba hari bamwe muri bagenzi babo banze kujya mu makoperative bemeza ko babyungukiyemo bagahabwa akazi kuko ababaha akazi batinya guha akazi abari mu makoperative.
Hagenimana Theogene umwe mu bafundi yabwiye Bwiza.com ko bakomeje gusaba abahagarariye abafundi gusaba ko hagenzurwa niba abatanga ibyangombwa byo kubaka bareba niba uwugiye kubaka ari umufundi uri muri koperative yemewe.
Yagize ati “ Twebwe abafundi bari mu makoperative turarengana kuko twagiye mu makoperative batubwira ko niba tutagiye mu makoperative ntawuzongera kuduha akazi ko kubaka twarabyitabiriye ariko dutungurwa nuko twaje kubona ahubwo aritwe bima akazi bitewe nuko abaturage iyo bamenye ko uri muri koperative bagiye kubaka nta byangombwa badashobora kuguha akazi ahubwo bagahitamo kugaha uwanze kuba muri koperative kuko atazubahiriza amabwiriza baduhaye ,ikindi tunasanga abafite ibyangombwa nabo bataduha akazi bitewe nuko hari abo usanga bashaka nko kubaka batagendeye ku bitenywa basabye no kureba niba metero z’umuhanda zubahirizwa uko bikwiye ,ibyo nibyo bituma abatanga ibyangomwa bazajya basaba uwubishaka kugaragaza abafundi bari muri koperative .”
Abafundi bitabiriye kujya mu makoperative bavuga kubona akazi bibagora ugereranyije n’abanze kujyamo bakora ku buryo butemewe n’amategeko.
Muhawenayo Damien ni umufundi ni umwe mu bafundi uri muri koperative uvuga ko babagamiwe no kudahabwa akazi kubera gusabwa kubahiriza amabwiriza.
Yagize ati “ Twishimiye ko kubakisha rukarakara byemewe ku nzu yo guturamo ariko imbogamizi dufite nuko abaturage badashobora kuduha akazi bitwaje ko nibatubwira kububakira tuzagendera ku mabwiriza baduhaye yo guca akajagari ariko dutangazwa nuko dutanga umusoro bakatwima akazi ariko abahisemo kwanga kujya muri koperative ugasanga bakabona kuko bo mu kubaka ntibita kuri metero z’umuhanda cyangwa ibikoresho byo bubakisha ,turasaba ko abazajya bafatwa bubaka badafite ikarita ya coperative babarizwamo bajya bahanwa kugirango twese tugire uburenganzira bungana ”.
Ubuyobozi bw’Akarere ka Rwamagana burahumuriza abafundi bukemeza ko batangiye n’ubuyobozi bw’amakoperative yabo mu guca akajagari mu myubakire nkuko byemezwa na Mudaheranwa Regis .
Agira ati “ Amabwiriza amaze gusohoka twatangiye kuyashyira mu bikorwa kandi twatangiye gukorana na koperative zabo zaradufashije cyane mu guca akajagari kuko twagize amahirwe yo gukorana nabo kuko bifasha abubakisha gukoresha abantu babyigiye kandi tukanizera ubuziranenge , ariko iyo utangiye ibintu bishya imbogamizi ntizibura niyo mpamvu twiyemeje gukomeza abatarabyumva tukabigisha nabo bakabyumva kuko uwubatse atubahirije amabwiriza bimugiraho ingaruka kuko bizana igihombo ku muntu wubaka nta byangomwa afite cyangwa atubahirije amabwiriza tuzakomeza gukorana na koperative zabo .”
Ingingo ya 13 mu mabwiriza y’umuyobozi mukuru w’ikigo cy’u Rwanda gishinzwe imiturire ajyanye no kubakisha rukarakara ivuga ko mu rwego rwo kunoza imyubakire y’inzu zo guturamo abafundi bose bagomba kwibumbira mu mashyirahamwe kandi amashyirahamwe nayo akagiirana amasezerano n’akarere abarizwamo. Iyo ngingo inavuga ko umufundi wese agomba kugira ishyirahamwe abarizwamo kandi ko nta mufundi wemerewe kubaka inzu ya Rukarakara atari mu ishyirahamwe .
Mu Karere ka Rwamagana ubu hari amakoperative y’abafundi 3 yemewe .
