Abaturage batuye mu kagari ka Nyamatete mu murenge wa Karenge w’akarere ka Rwamagana nyuma y’umuganda rusange wabaye kuri uyu 28 Gicurasi 2022, basabye Guverineri Gasana Emmanuel kubafasha kubona inkunga yo gusana ibiro by’akagari kabo, abizeza ko bazizihiza umunsi wo kwibohora muri Nyakanga bafite ibishya.
Umuturage witwa Nyirishema Isaie ni we wagejeje iki kibazo kuri Guverineri Gasana wari kumwe na bo mu muganda. Yagize ati: “Dufite ikibazo cy’ibiro by’akagari bishaje. Mu mbaraga zacu dufite twaguze ikibanza, dutunda amabuye, nkaba nagira ngo mudufashe mudutere inkunga dusane akagari kacu.”
Guvereneri Gasana uyobora intara y’Ibirasirazuba iherereyemo akarere ka Rwamagana, yasabye inzego z’umutekano n’akarere gufasha abaturage bakazizihiza umunsi wo kwibohora tariki ya 4 Nyakanga 2022 bafite ibiro by’akagari bishya.
Yagize ati: “Mureke muri iyi nama dukore umuhigo. Dufite Komiseri uhagarariye polisi hano mu ntara, hari Colonel uhagarariye ingabo na Komiseri uhagarariye ishuri rya RCS. Inkunga yose bazazana nubwo yaba ibikoresho, akarere na ko kakadufasha bakazana amabati n’ibindi bikoresho by’imbere, Ku itariki ya 4 Nyakanga tuzagaruke kuri ako kagari dutereke intango, duhigure umuhigo. Dutangire icyo gikorwa ukwezi tuzabe turangije kukubaka, nibiba ngombwa tuzatumire undi mushyitsi arebe icyo twakoze, uwo munsi wo kwibohora uzabe dufite ibiro by’akagari bishya.”
Muri uyu muganda rusange, hacukuwe imirwanyasuri mu mashyamba y’abaturage.
