Polisi y’u Rwanda ikorera mu karere ka Rwamagana, yeretse itangazamakuru abagabo barindwi bakekwaho kwiba Umwongerezakazi ibikoresho bitandukanye, bakavuga ko bamwibye bashaka amafaranga y’Iminsi Mikuru.
Saa tanu z’ijoro ryo ku wa 18 Ukuboza ni bwo abajura bateye mu rugo rw’uriya Mwongerezakazi witwa Hannan Louise ucumbitse mu kagari ka Nyagasenyi ho mu murenge wa Kigabiro, bamutwara ibikoresho birimo Televiziyo, Camera na mudasobwa.
Barindwi berekanwe na Polisi barimo batatu bakekwaho kwiba biriya bikoresho, batatu bari babiguze n’umwe wakuye umubare w’ibanga muri mudasobwa yari yibwe mbere y’uko igurishwa.
Bariya bagabo uko ari barindwi bafashwe hagati y’itariki ya 24 na 28 Ukuboza 2020.
Abafashwe bemereye imbere y’itangazamakuru icyaha cyo kwiba biriya bikoresho, bakemeza ko babikoze bashaka amafaranga yo gukoresha mu minsi mikuru.
Uwitwa Siborurema Emmanuel ukomoka mu karere ka Kayonza uri mu berekanwe yagize ati: “Ni twe twabyibye, twari twahuriye ku muhungu witwa Joax turanywa turasinda, twari tumaze kunywa izo nzoga turavuga ngo tujye gushaka amafaranga y’umunsi mukuru. Isomo nkuyemo nuko ibyo twakoze atari byiza, nkaba nsaba Abanyarwanda bose imbabazi kandi icyo cyaha nari narigeze kugihanirwa naho ntuye bose barabizi ko nari narabiretse.”
Muhawenimana Patrique utuye murenge wa Gishari na we yemeje ko binjiye mu nzu baciye mu idirishya mu masaha ya saa tanu z’ijoro bagiye gushaka amafaranga yo kurya mu minsi mikuru.
Ati: “Twahuriye kuri uyu muhungu kubera ko yari afunguwe, turanywa turavuga ngo kubera ko twangije amafaranga tujye gushaka andi nituyabona turaba dufite amahirwe y’iminsi mikuru. Inzu ya mbere twahingukiyeho twarebye mu idirishya tubona harimo fulate (Flat TV), mbwira uriya muhungu ngo ndogo duhita twinjiramo. Ibindi byo nabibonye nyuma nkaba nsaba imbabazi kuko kuva nshatse umugore nari ntarongera kubikora.”
Umuvugizi wa Polisi y’u Rwanda mu Ntara y’Iburasirazuba, CIP Twizeyimana Hamuduni, yavuze ko bariya bajura bafashwe kubera amakuru Polisi y’igihugu yahawe n’abaturage, aboneraho gusaba abaturage kwicungira umutekano.
Yagize ati: “Umuzungu akimara kwibwa yaje gutanga ikirego kuri RIB ku bufatanya Polisi ifitanye na RIB, dutangira gushakisha dufata umwe. Turasaba abaturage ko tugomba gukomeza gukaza gukora amarondo tunasaba abaturage kujya baduha amakuru.”
CIP Twizeyimana yunzemo ati: “Muri ibi byumweru nka bitatu bishize tumaze gufata televiziyo zigera ku munani. Turasaba abaturage kwifashisha ibikoresho by’ikoranabuhanga mu gucunga umutekano w’ibintu byaba, tunabashishikariza kugira abazamu.”
