Rwanda imepiga hatua kubwa katika nyanja mbalimbali, lakini sekta ya elimu imeachwa nyuma – jambo ambalo linaweza kuwa tatizo kubwa “ikiwa halitarekebishwa haraka”.
Haya yalibainishwa hivi karibuni na Olivier De Schutter, Mwandishi Maalum wa Umoja wa Mataifa kuhusu umaskini uliokithiri na haki za binadamu, alipokuwa ziarani nchini Rwanda.
De Schutter alisema Rwanda imefanikiwa kupunguza umaskini, lakini bado kuna changamoto nyingi, akieleza kuwa Mnyarwanda mmoja kati ya watatu bado anaishi chini ya mstari wa umaskini. Alisisitiza kuwa elimu ni moja ya sekta zenye changamoto kubwa.
Alisema: “Ubora wa elimu ni mdogo sana. Rwanda inashikilia nafasi ya 160 kati ya nchi 175 kulingana na ripoti ya Benki ya Dunia. Walimu hawajafundishwa vizuri, na madarasa ya shule za msingi yamejaa wanafunzi kupita kiasi licha ya kujengwa kwa zaidi ya madarasa mapya 25,000 katika kipindi cha miaka saba iliyopita.”
De Schutter aliongeza kuwa asilimia 64 ya wanafunzi wa shule za msingi husoma kwa zamu – wengine asubuhi na wengine alasiri – hali inayodhihirisha uhaba wa madarasa na walimu, na ambayo huathiri ubora wa elimu ya msingi.
Pia alizungumzia wasiwasi kuhusu deni la taifa la Rwanda, ambalo kufikia mwezi Januari mwaka huu lilifikia asilimia 78 ya pato la taifa (GDP).
Deni hilo limeilazimisha serikali kuchukua hatua kali kupunguza nakisi ya bajeti, jambo ambalo mtaalamu huyo anasema linaweza kuathiri fedha zinazotengwa kwa ajili ya ustawi wa kijamii.
Akizungumza na waandishi wa habari Ijumaa, Olivier De Schutter alisema kuwa kati ya mwaka 2017 na 2024, watu milioni 1.5 walitoka kwenye umaskini nchini Rwanda, lakini wengine milioni 3 bado wako chini ya mstari wa umaskini.
