Rwongeye kwambikana hagati ya FARDC na M23

Imirwano hagati y’Ingabo za Repubulika Iharanira Demokarasi ya Congo n’inyeshyamba z’umutwe wa M23 yongeye kubura, nyuma y’agahenge kari kamaze iminsi hagati y’impande zombi.

Amakuru aturuka muri RDC aravuga ko imirwano hagati y’impande zombi kuva mu gitondo cyo kuri uyu wa Gatanu tariki ya 22 Ukuboza 2023 iri kubera mu gace ka Matanda ho muri Teritwari ya Masisi.

Matanda ni agace gaherereye mu bilometero bibarirwa muri bitanu uvuye mu gace ka Rubaya gakungahaye ku mabuye y’agaciro.

M23 biciye muri Bertrand Bisimwa ukuriye ishami ryayo rya Politiki, yavuze ko “ihuriro ry’Ingabo z’ubutegetsi bwa Kinshasa ryateye ibirindiro bya ARC/M23 muri Teritwari ya Masisi ryica agahenge kasabwe n’umuryango mpuzamahanga.”

Bisimwa yavuze ko amakuru ahari ari ay’uko Ingabo za Congo ziteganya gukaza no kwagura ibitero byazo.

Yunzemo ati: “Uku kongera kwinjira mu ntambara kw’Ingabo z’ubutegetsi bwa Kinshasa kurerekana intangiriro y’ishyirwa mu bikorwa ry’iterabwoba ryatangijwe na Perezida ucyuye igihe akanaba umukandida muri manda ya kabiri, Félix Antoine Tshisekedi Tshilombo; ubwo yasozaga ibikorwa bye byo kwiyamamaza.”

M23 yatanze impuruza y’uko nyuma ya biriya bitero iza kwirwanaho kinyamwuga, mu rwego rwo kurengera abasivile.

Imirwano hagati ya FARDC na M23 yongeye kubura, nyuma y’iminsi 11 Leta Zunze Ubumwe zitangaje agahenge hagati y’impande zombi.

Ni agahenge ku ikubitiro kagombaga kumara iminsi itatu, nyuma kaza kongerwaho ibyumweru bibiri.