Rais Félix-Antoine Tshisekedi siku ya Ijumaa alipokea ujumbe wa wabunge 11 wa Bunge la Umoja wa Ulaya (EU), waliothibitisha tena kuwa wapo upande wake na walieleza kuwa EU inapaswa kushiriki kikamilifu katika kutafuta suluhisho la matatizo ya Jamhuri ya Kidemokrasia ya Kongo (DRC), hasa baada ya EU kupitisha azimio la kulaani Rwanda bila pingamizi.
Kwa mujibu wa Ikulu ya Congo, wabunge hao waliwasilisha ujumbe rasmi wa mshikamano kutoka kwa Umoja wa Ulaya kwa serikali ya DRC.
Hilde Vautmans, aliyekuwa kiongozi wa ujumbe huo, alisema walijadili masuala mbalimbali muhimu, ikiwa ni pamoja na msaada kwa waathirika, kupambana na ukatili wa kingono unaotumika kama silaha ya vita, pamoja na mchakato wa amani unaoendelea.
Alilaani vikali ukatili huo kwa kusema:
“Imetosha. Hali hii lazima ikome.”
Kuhusu juhudi za kidiplomasia kama vile mchakato wa Luanda na Nairobi, pamoja na mazungumzo yaliyofanyika Doha na Washington, mbunge mmoja wa EU alisema:
“Ulaya inaweza kushiriki, kwa kuwa tayari imetoa azimio la kulaani uchokozi wa Rwanda.”
Ziara hiyo inasemekana kufuatia mwaliko wa Rais wa Seneti ya Congo, Sama Lukonde Kyenge, aliyewasilisha mwaliko huo kwa wabunge hao alipokuwa makao makuu ya Umoja wa Ulaya mnamo tarehe 27 Machi 2025, kulingana na taarifa ya Radio Okapi.
Hata hivyo, ziara hii ni sehemu ya jitihada za mataifa ya Ulaya kutaka kurejesha ushawishi wao katika suluhisho la mgogoro wa Congo, kwani inaonekana kama wameachwa nyuma na mashirika kama Umoja wa Afrika (AU), Marekani, na hivi karibuni Qatar. Kukosekana kwa EU kwenye meza ya majadiliano ni jambo linalotia wasiwasi, hasa kwa mataifa kama Ubelgiji na Ufaransa.
