Umunya-Sénégal Sadio Mané ntagikiniye ikipe y’igihugu cye mu mikino y’Igikombe cy’Isi cya 2022, nyuma y’imvune ikomeye yaraye agize.
Uyu rutahizamu Sénégal yagenderagaho yaraye avunikiye mu mukino wa shampiyona y’Abadage Bayern Münich asanzwe akinira yanyagiyemo Werder Bremen ibitego 6-1.
Ikinyamakuru L’Equipe cyatangaje ko Mané yacitse umutsi w’inyuma ku gatsitsino, bityo akaba agomba kumara ibyumweru byinshi adakandagira mu kibuga. Ni ibisobanura ko atazagaragara mu mikino y’Igikombe cy’Isi ibura iminsi 10 igatangira mu gihugu cya Qatar.
Sadio Mané yavunitse mu gihe byari byitezwe ko ku wa Gatanu w’iki cyumweru yari kuzaba ari mu bakinnyi umutoza Aliou Cissé azahamagara, mu rwego rwo kuzabifashisha muri iriya mikino.
