Ikipe ya Liverpool yo mu Bwongereza yamaze kumvikana na Bayern Munich yo mu Budage ko igomba kuyigurisha rutahizamu Sadio Mané.
Uyu munya-Sénégal agomba kwerekeza muri Bayern Munich kuri miliyoni 41 z’ama-Euro.
Ku ikubitiro Bayern Munich igomba kumutangaho miliyoni 32 z’ama-Euro, nyuma ikazamutangaho miliyoni 6 bitewe n’imikino azakina ndetse n’izindi miliyoni 3 zizatangwa bitewe n’ibikombe azahesha iriya kipe.
Liverpool yumvikanye na Bayern Munich nyuma y’uko iyi kipe yo mu Budage iyihaye amafaranga inshuro ebyiri iri kuyanga.
Sadio Mané yari umukinnyi wa Liverpool nyuma yo kuyigeramo muri 2016 avuye muri Southampton.
Kuva icyo gihe Liverpool yari amaze kuyitsindira ibitego 120, birimo 90 bya Premier league.
Amakuru y’uko uyu rutahizamu agomba kuva muri Liverpool yari amaze igihe avugwa, gusa yafashe indi ntera ku wa Kane w’iki cyumweru ubwo iyi kipe yasinyishaga umunya-Uruguay Darwin Nuñez.
Mu myaka itanu Mané yari amaze muri Liverpool, yayifashije gutwara ibikombe bitandukanye birimo Premier league na UEFA Champions league.
Byitezwe ko muri Bayern Munich agomba gusimbura umunya-Pologne Robert Lewandowski ugomba gusohoka muri iyi kipe akerekeza muri FC Barcelona yo muri Espagne.
