Rais wa Rwanda, Paul Kagame, amewasili St. John’s, mji mkuu wa Antigua na Barbuda, kwa ajili ya kushiriki katika Mkutano wa Wakuu wa Serikali wa Jumuiya ya Madola (CHOGM).
Mkutano huu, wa 28 tangu kuanza kwa mikutano ya aina hii mwaka 1971, unazingatia kuharakisha ushirikiano na uwekezaji ili kuchochea maendeleo katika nchi wanachama wa Jumuiya ya Madola.
Mbali na Rais Kagame, viongozi wengine wapo katika mkutano huo, wakiwemo Waziri Mkuu wa Antigua na Barbuda, Gaston Browne; Mfalme Charles III wa Uingereza na Malkia Camilla; pamoja na Katibu Mkuu wa Jumuiya ya Madola, Shirley Ayorkor Botchwey.
Hafla hiyo pia inawakutanisha wakuu wengine wa nchi na serikali, mawaziri, wawakilishi kutoka sekta binafsi, mashirika yasiyo ya kiserikali, na wawakilishi wa vijana.
Washiriki wanatarajiwa kujadili njia za nchi wanachama wa Jumuiya ya Madola kuimarisha ushirikiano na washirika wao, kwa lengo la kukuza biashara ndani ya jumuiya hiyo na kuongeza uwekezaji unaochangia kwa kiasi kikubwa katika maendeleo ya kiuchumi.
Ajenda ya mkutano inajumuisha majadiliano ya ngazi ya juu, vikao mbalimbali, mkutano wa viongozi wa faragha, na mazungumzo na wawakilishi wa sekta binafsi. Rais Kagame atashiriki katika mjadala wa ngazi ya juu pamoja na Waziri Mkuu wa Jamaica, Andrew Holness, na Naibu Waziri Mkuu wa Samoa, Mulipola Anarosa Ale Molioʻo. Mazungumzo hayo yatalenga jinsi Jumuiya ya Madola inavyoweza kutumia vyema uwezo wake kujenga mustakabali mwema zaidi kwa raia wa nchi wanachama wake.
Rais Kagame pia anatarajiwa kuhudhuria hafla rasmi ya ufunguzi wa CHOGM 2026, ambayo itawakutanisha wakuu wa nchi na serikali wanaoshiriki katika mkutano huo.
Kama sehemu ya ziara yake, Rais Kagame Jioni, alihudhuria gwaride la sherehe lililofanyika kuadhimisha miaka 45 tangu Antigua na Barbuda ipate uhuru kutoka Uingereza, uhuru ambao ulitolewa mnamo tarehe 1 Novemba 1981.
Mkutano wa Wakuu wa Serikali za Jumuiya ya Madola (CHOGM) utafanyika mjini St. John’s, Antigua na Barbuda, kuanzia tarehe 1 hadi 4 Novemba 2026.
Mkutano huu, ambao hufanyika kila baada ya miaka miwili, ni jukwaa muhimu la kufanya maamuzi yanayohusu nchi 56 wanachama wa Jumuiya ya Madola—mataifa yenye jumla ya watu wapatao bilioni 2.7, idadi inayowakilisha theluthi moja ya watu wote duniani.