Serikali ya Jamhuri ya Kidemokrasia ya Congo (DRC) imetoa tahadhari kuwa waasi wa M23 wanaelekeza maelfu ya wapiganaji kuelekea mji wa Uvira, wakilenga kuuteka.
Hii ilitangazwa na Patrick Muyaya Katembwe, Waziri wa Habari na Mawasiliano na Msemaji wa Serikali ya DRC.
Akizungumza katika baraza la mawaziri, alisema:
“Katika Kivu Kusini, tumebaini kuwa M23 wanaongeza idadi ya wapiganaji katika maeneo yote ya mapambano. Lengo lao ni kuchukua tena maeneo yaliyoko mikononi mwa FARDC, hasa Uvira.”
Uvira, mji wa pili kwa ukubwa katika mkoa wa Kivu Kusini, baada ya Bukavu (unaodhibitiwa na M23 tangu Februari), sasa uko katika hatari ya kuvamiwa.
Wakati hayo yakiendelea, M23 nao wanaituhumu Kinshasa kwa kupeleka askari wengi katika maeneo ya raia, wakidai kuwa serikali inajipanga kufanya mashambulizi yanayohatarisha usalama wa raia.
Ripoti zinaonesha kuwa serikali ya DRC inapanga kutuma wanajeshi wapatao 60,000 kuelekea mashariki mwa nchi na hata Bujumbura, Burundi, kwa lengo la kurejesha miji kama Goma na Bukavu iliyo mikononi mwa waasi.
Katika Uvira pekee, wanajeshi wa FARDC takriban 7,000 tayari wamewasili, wakisaidiwa na wapiganaji wa FDLR, Wazalendo, wanajeshi wa Burundi, na hata watu waliodaiwa kuwa mamluki kutoka Colombia.
Mvutano unazidi kuongezeka kati ya pande hizo mbili, hata kama mazungumzo ya amani ya Doha yameanza tena hivi karibuni.
Ijumaa, msemaji wa M23, Lawrence Kanyuka, alishutumu serikali ya DRC kupitia ukurasa wake wa X, akidai kuwa serikali inasambaza propaganda na habari za uongo ili kuvuruga mazungumzo ya Doha.
