Somalia: Al Shabab yafashe umujyi irongera iwuvamo yishe abasirikare ba leta n’abasivili

Kuri uyu wa Kane, abarwanyi bo mu mutwe wa al Shabaab bo bagabye igitero mu mujyi uherereye mu majyaruguru y’umurwa mukuru, Mogadishu, bahitana byibuze abantu barindwi ubwo barwanaga n’inzego z’umutekano za leta, nk’uko umuturage na polisi babitangaje.

Iki gitero cyabaye mu gihe hari amakimbirane ya politiki hagati ya Perezida wa Somaliya na Minisitiri w’Intebe abafatanyabikorwa mpuzamahanga b’iki gihugu bahangayikishijwe no kuba ibi birangaza leta mu kurwanya inyeshyamba.

Igipolisi n’abaturage bo muri Balad, ku birometero 30 mu majyaruguru ya Mogadishu, bavuze ko abarwanyi bo mu mutwe ukorana n’umutwe w’iterabwoba wa Al Qaeda bagabye igitero maze bakarusha imbaraga ingabo za leta zirinda ikiraro ku marembo y’umujyi mu gitondo cya kare.

“Twari mu musigiti dusenga igihe humvikanaga urusaku rwinshi rw’imbunda ku kiraro. Al Shabaab rero yigaruriye umujyi, imaze kunesha abasirikari ku kiraro,” uyu ni umucuruzi Hassan Nur wo mu Mujyi wa Balad avugana na Reuters.

Hassan Nur yakomeje agira ati “Muri uwo mujyi hari abapolisi bake. (Abapolisi) baburiwe irengero. Igihe kurasa byatangiraga abantu birukiye mu nzu zabo. Nabaruye abasirikare batanu bapfuye n’abagore babiri b’abasivili ”.

Kapiteni wa polisi, Farah Ali, yatangaje ko abarwanyi bagumye mu mujyi igihe gito nyuma y’igitero ariko bakongera bakagenda.