Byibuze abantu batandatu bapfuye abandi 13 barakomereka mu gitero cy’ubwiyahuzi i Mogadishu, nk’uko byatangajwe n’abashinzwe umutekano ndetse n’ishami rishinzwe ubutabazi muri uyu mujyi.
Nk’uko abategetsi ba Somalia babitangaza, ngo umwiyahuzi yibasiye minibus yuzuye intumwa zitabiriye amatora y’abadepite. Yaturikije ikoti rye ritezemo igisasu hafi ya bariyeri igana ku ngoro ya perezida.
Umuyobozi w’ikigo gishinzwe imbangukiragutabara, i Mogadishu, Abdikadir Abdirahman Adem ati: “Ikipe yanjye yatwaye imirambo itandatu na 13 bakomeretse mu bitaro.”
Umuvugizi wa polisi muri Somalia, Colonel Abdifatah Aden Hassan, yatangaje ko abakomeretse bose ari abasivili kandi biteganijwe ko raporo yuzuye ku bahitanywe n’igitero izashyirwa ahagaragara nyuma nk’uko iyi nkuru dukesha VOA ivuga.
Ati: “Dushobora kwemeza ko icyo gitero cyagabwe n’umwiyahuzi kandi ko abishwe n’abakomeretse bose ari abasivili”.
Umwiyahuzi yiyahuye yiruka inyuma y’imodoka agerageza gufata umuryango w’inyuma, ubwo abapolisi bavugije induru ngo “hagarara!” bamutunze imbunda. Yahise yituritsa nk’uko abatangabuhamya babivuga.
Umutwe w’iterabwoba wa Al-Shabab wahise wigamba icyo gitero cyo kuwa Kane nta kuzuyaza.
