Ni itangazo ryashyizwe ahagaragara na Minisiteri y’ububanyi n’amahanga ya Somalia, ryasohotse ku mugoroba wo ku wa Gatanu itariki ya 20 Nzeri 2024, ryatangaje ibyo birego bishya .
Mogadishu ivuga ko hari “ibimenyetso byanditse byemeza ko amakamyo abiri yari atwaye intwaro yavuye muri Ethiopia yerekeza mu karere ka Puntland.”
Itangazo rigenewe abanyamakuru risobanura kandi ko izo ntwaro zatwawe “nta masezerano ya dipolomasi cyangwa uburenganzira bahawe”.
“Ingaruka zikomeye”
Itangazo rigira riti: “Iki gikorwa ni igitero gikomeye ku busugire bwa Somalia. ” Kandi rishimangira ko uku gutanga intwaro bifite ingaruka zikomeye ku mutekano w’igihugu ndetse n’akarere.
Icyakora, abategetsi ba Somalia ntibagaragaza igihe itangwa ryakozwe n’uwahawe izo ntwaro uwo ari we nk’uko iyi nkuru dukesha RFI ivuga.
Umubano hagati y’ibihugu byombi byo mu Ihembe rya Afurika umaze amezi hafi icumi utifashe neza na gato. Ni nyuma y’uko muri Mutarama 2024, hatangajwe ko Addis Abeba yagiranye amasezerano y’ubwumvikane na Somaliland, yari gutuma Ethiopia yemera Somaliland nka leta yigenga.
Nyuma y’ayo masezerano, Somalia yasinyanye na Misiri amasezerano ya gisirikare muri Kanama 2024 mu rwego rwo kwiyegereza iki gihangange mu gisirikare muri Afurika kidacana uwaka na Ethiopia.
Imishyikirano yatangijwe iyobowe na Turkiya yo kugerageza kumvikanisha impande zombi ntacyo irageraho kugeza ubu.
